စစ်ဖြစ်ဦးမလား(ဘဝင်း)

(၁) အဝေးမှာ စစ်ဖြစ်တာတော့ တခြိမ်းခြိမ်းပဲ၊ ပြောချင်တာက အာရှတောင်ပိုင်းမှာ ဖြစ်မဖြစ်ကိုပြောချင်တာပါ၊ တရုတ်က ငါးမျှားကျွန်း (တျောက်ယွီ) လို့ခေါ်ပြီး ဂျပန်က စင်ကာကူ (ဘာအဓိပ္ပာယ်မှန်းမသိ။ ရှိတော့ရှိလိမ့်မယ်) ခေါ်တဲ့ ကျွန်းကလေးတစုရဲ့ကိစ္စကနေ စစ်ဖြစ်နိုင် တယ်။ တရုတ်ရဲ့အနောက်တောင်ဘက်က ဗမာပြည်ကမုချပါလာအောင် လုပ်ကြမှာပဲ။ ကျွန်တော်တို့သဘောထားက …
- ကိုယ့်အခြေခံအကျိုးစီးပွားကိုမထိခိုက်ရင် ဘေးရှောင်နေရမယ်။ အခု လွတ်လပ်တဲ့ဗမာပြည်ဖြစ်နေပြီ၊ ရှောင်လို့ရတယ်၊ ကိုယ့်အမျိုးသားအကျိုးစီးပွားကိုပဲ ဦးထိပ်ထားရမယ်၊ ဘယ်သူကဆွယ်ဆွယ် မပါစတမ်းတင်းခံဖို့လိုတယ်၊
- နိုင်ငံကြီးတွေဆိုတာက ကိုယ်မပါရတဲ့စစ်ပွဲမှာ ကြားကနေအမြတ်ထုတ်ချင်ကြတာချည်းပဲ။ ဗမာစကားပုံက “ကြက်လည်းပမ်း ယာလည်းညက်” လုပ်ချင်ကြတယ်။ တရုတ်ကတော့ “ကျား(၂) ကောင်ကိုက်တာ တောင်ပေါ်ကထိုင်ကြည့်” ဆိုလား။ ထိုင်ကြည့်တာ သက်သက်ပဲ။ ဗမာစကားပုံကမှ ကြက် (၂) ကောင်လည်းရ။ ကိုယ့်ယာလည်းညက်တာမို့ ပိုဆီလျော်တယ်ထင်တယ်။
ဒီစကားပြောရတာက ၂၀ ရာစုရဲ့‘၄၀’ စုနှစ်တွေက အတွေ့အကြုံအရ ပြောတာပဲ၊ ၁၉၃၁ ကတည်းက ဂျပန်နဲ့တရုတ်တိုက်နေကြတာပဲ။ အဲဒီတုန်းက အင်္ဂလိပ်၊ အမေရိကန်က ‘ခွစား’ နေတာပဲ။ ဂျပန်က တရုတ်တပြည်လုံးသိမ်းမယ်ဆိုမှ ရေနံကိုဖြတ်၊ စစ်အတွက်လိုအပ်တဲ့ သဘာဝသယံဇာတမှန်သမျှကိုဖြတ်တော့ ဂျပန်ရဲ့ အထိမခံနိုင်တဲ့အခြေခံအကျိုးစီးပွားထိလာလို့ ဂျပန်က ပုလဲဆိပ်ကမ်းအလစ်အငိုက်တိုက်ပြီး ပစိဖိတ်သမုဒ္ဒရာတခြမ်းကို စိုးမိုးဖို့လုပ်လာရတာပဲ။
ဂျာမဏီနာဇီကလည်း ဟော်လန်၊ ပြင်သစ်ကိုနိုင်လိုက်တော့ အရှေ့တောင်အာရှက အထက်ပါ(၂) နိုင်ငံပိုင်ကိုလိုနီတွေကိုလည်း အလွယ်သိမ်းနိုင်မယ်ဆိုတာတွက်လို့ ရေနံ၊ သတ္တု၊ ကြက်ပေါင်စေး အရင်းအမြစ်တွေရှိတဲ့ဒေသကိုသိမ်းချင်တာပဲ။ ဟစ်တလာအစိုးရက ဂျပန်ကို ဆိုဗီယက်ရဲ့အရှေ့ဘက်ကနေ တိုက်စေချင်တယ်။ တိုက်ရင် ဆိုက်ဗေးရီးယား သစ်တောကြီးနဲ့ရေခဲမြစ်ကြီးပဲရမှာပဲ၊ ဒါကြောင့် ရေနံတွေရနိုင်မယ့် သဘာဝအရင်းအမြစ်တွေရှိတဲ့တောင်ပိုင်းကို ဂျပန်က ဦးလှည့်တာဖြစ်တယ်။
ကျွန်တော်တို့ သုံးသပ်ချက်က …

- အထိမခံနိုင်တဲ့ အခြေခံအမျိုးသားအကျိုးစီးပွားကို ထိလာရင် စစ်ဖြစ်မှာပဲ။
- ဂုဏ်သိက္ခာအတွက်တော့ စစ်မဖြစ်ဘူး။
- တရုတ် ဂျပန် စစ်ဖြစ်ရင် အမေရိကန်က ဂျပန်ဘက်ပင်းတဲ့ “ကြားနေရေး” လုပ်မယ် ထင်တယ်၊ အမေရိကန်ရဲ့အခြေခံအမျိုးသားအကျိုးစီးပွားက တကယ်တော့ အာရှမှာမရှိဘူး၊ ဥရောပမှာတောင် မရှိဘူး။ သူ့ပတ်ဝန်းကျင်မှာပဲ ရှိတယ်။
အခုလို ဂြိုဟ်တုခေတ်၊ အနုမြူခေတ်၊ တိုက်ချင်းပစ်ဒုံးပျံခေတ်မှာ စစ်ထဲပါဖို့ အထပ်ထပ်စဉ်းစားလိမ့်မယ်။ “၂ဘက်စလုံး” ကျေပြုန်းမယ်ဆိုတဲ့အယူအဆ (MAD) ကလည်း ရှိနေတယ်။ ဒါကြောင့် အမေရိကန်က ကြားနေဟန်ဆောင်ပြီး ဂျပန်ဘက် ပင်းလိမ့်မယ်။ အာရှ အထူးသဖြင့် ပစိဖိတ်ကမ်းခြေအနောက်ပိုင်းမှာပဲ
ကန့်သတ်စစ် ဖြစ်နိုင်တယ်။
ဒီကျွန်းကလေးကိစ္စမှာ တရုတ်ပြည်မကြီးနဲ့ထိုင်ဝမ် ပေါင်းစည်းမိသွားအောင် လုပ်ပေးသလိုဖြစ်မှာ စိုးမှာပဲ။ (အခုပြဿနာဖြစ်နေတဲ့ ကျွန်းကလေးတွေကိစ္စက (KMT) ချန်ကေရှိတ်အစိုးရက စခဲ့တဲ့ကိစ္စပါ၊) အခြေခံအမျိုးသားအကျိုးစီးပွားနဲ့ပတ်သက်လာရင် တရုတ်တွေကညီညွတ်လေ့ရှိတဲ့သမိုင်း ရှိပါတယ်။
(၂) ဉာဏ်တထွာတမိုက်နဲ့ကိစ္စကြီးကိုင်တယ်လို့ ဆိုချင်ဆိုပါ။ ဗမာပြည်ရဲ့ “အခြေခံအမျိုးသားအကျိုးစီးပွား” ဘက်ကပဲ ကျွန်တော်တို့ ရပ်တည်နေကြောင်း အားလုံးသိစေဖို့ ရေးပါတယ်။

ဘ၀င်း
(၁ – ၁၀ – ၂၀၁၂)
အရေးတော်ပုံဂျာနယ်
(ယူတာက) http://www.naytthit.net/?p=31063