လက်ပန်းတောင်းစုံကော်အစီရင်ခံစာနဲ့စပ်လို့ ခေတ်မောင်းအမြင်။

လက်ပန်းတောင်းစုံကော်အစီရင်ခံစာနဲ့စပ်လို့ ခေတ်မောင်းအမြင်။
စုံကော်ရဲ့လက်ပန်တောင်းအစီရင်ခံစာဟာ ဦးပိုင်နဲ့ တရုတ်ကုမ္ပဏီတို့အတွက် မင်္ဂလာသတင်း၊ လက်ပန်တောင်းတောင်ကိုမှီပြီး သက်မွေးဝမ်းကျောင်းနေရသူတွေအတွက်တော့ အမင်္ဂလာသတင်းပဲ။ အကောင်းအဆိုး၊ မင်္ဂလာအမင်္ဂလာဒွန်တွဲမှုက ဒီကိစ္စမှာ သိသာလွန်းလှတယ်။ စုံကော်အစီရင်ခံစာဟာ လက်ပန်းတောင်းလယ်သမားတွေအတွက် အမင်္ဂလာဖြစ်မှသာ ဉီးပိုင်နဲတရုတ်ကုမ္ပဏီတို့ အတွက် မင်္ဂလာသတင်းဖြစ်နိုင်မယ်။ ဆိုးလိုက်တဲ့ကံကြမ္မာနှယ်။

တကယ်တော့ နိုင်ငံတော်ပိုင်လုပ်ငန်းတွေ၊ အမျိုးသားပိုင်လုပ်ငန်းတွေရဲ့အကျိုးကျေးဇူးကို တတိုင်းပြည်လုံးက ထိုက်သင့်စွာအညီအမျှခံစားနိုင်မှသာ ဒီလုပ်ငန်းတွေအတွက်အကျိုးရှိတဲ့အရာဟာ တိုင်းပြည်အတွက်ပါအကျိုးရှိမယ်ဆိုတဲ့ကျိုးကြောင်းပြဆိုချက်ကအဓိပ္ပါယ်ရှိနိုင်မယ်။ ဒါပေမယ့် ဦးပိုင်ကုမ္ပဏီအကျိုးရှိတာဟာ တတိုင်းပြည်လုံးအကျိုးရှိမှုမဟုတ်တဲ့အပြင် စကတည်းက ပင်ပင်ပန်းပန်း လုပ်ကိုင်စားသောက်နေရသူတွေ ဘဝကိုစတေးပြီးမှ ဦးပိုင်လို စစ်အုပ်စုလူတန်းစားကွက်ကွက်လေးချမ်းသာနိုင်တာကို တတိုင်းပြည်လုံးမှာ အတိတ်နဲ့ လက်ရှိပစ္စုပ္ပန်မှာကိုမြင်နေရတဲ့အဖြစ်အပျက်တွေက အထင်အရှားပြသနေတယ်။ နောက်တခါ ဦးပိုင်တို့လိုကုမ္ပဏီတွေဟာ စစ်အုပ်စုရဲ့အကျိုးစီးပွားကိုတာဝန်ခံ ကာကွယ်ပေးဖို့၊ ဖော်ဆောင်ပေးဖို့ပေါ်လာတဲ့ အလုပ်လုပ်နေတဲ့စီးပွားရေးကုမ္ပဏီတွေဖြစ်ပြီး ပြည်သူလူထုကိုတာဝန်ခံထားတာ မဟုတ်ဘူး။ ဒီလိုဦးပိုင်ကုမ္ပဏီ၊ သူနဲ့ဖက်စပ်လုပ်ကိုင်နေတဲ့တရုတ်ကုမ္ပဏီတို့ဖြစ်စေချင်တဲ့အစီရင်ခံစာမျိုးကို အကာအကွယ်မဲ့တဲ့တောသူတောင်သားတွေကို အထက်စီးကနေပြီးအတင်းအကြပ်လက်ခံခိုင်းတာဟာ သူခိုးဓားပြကုမ္ပဏီတွေရဲ့ဖောက်ပြန်တဲ့လုပ်ရပ်တွေမှာ ကြံရာပါအဖြစ်နဲ့ဝင်ပါနေတာပဲ။ အထူးသဖြင့် ဒီကုမ္ပဏီတွေအကျိုးရှိရုံနဲ့ တတိုင်းပြည်လုံးအကျိုးရှိမယ်လို့ သူ့အနေနဲ့ ဘယ်လိုမှ အာမမခံနိုင်ချိန်မှာ ဒေါ်အောင်ဆန်းစုကြည်အနေနဲ့ ဦးပိုင်ကြံရာပါဆိုတဲ့နံမယ်ကို လက်မခံချင်လို့မရဘူးလို့ ခေတ်မောင်းကယူဆတယ်။
နိုင်ငံရေးလုပ်တဲ့အခါ ရေပန်းမစားတဲ့၊ လူကြိုက်များမှာမဟုတ်တဲ့လုပ်ရပ်တွေကိုလုပ်ရတာ၊ လူမုန်းခံရနိုင်တဲ့အချက်ကို လက်မခံနိုင်စရာမရှိပါ။ ဒါပေမယ့် ကိုယ့်ဆုံးဖြတ်ချက်၊ ကိုယ့်လုပ်ရပ်ဟာ မှန်ကန်တဲ့တရားတဲ့လုပ်ရပ်ဖြစ်တာကို အခိုင်အမာတရားထူထောင်နိုင်စွမ်းရှိရမယ်။ အခု လက်ပံတောင်းကိုဆက်လုပ်ဖို့ ထောက်ခံတင်ပြထားတဲ့အကြံပေးချက်ဟာ မှန်ကန်တဲ့တရားတဲ့လုပ်ရပ်အဖြစ် တရားထူထောင်နိုင်စွမ်းမရှိဘူးလို့ ခေတ်မောင်းကယူဆတယ်။ အခု အစီရင်ခံစာမှာ လက်ရှိဖော်ဆောင်နေတဲ့လက်ပံတောင်းစီမံကိန်းဟာ သဘာဝပတ်ဝန်းကျင်ကို ပျက်စီးစေတယ်၊ အနာဂတ်မျိုးဆက်အတွက်အကျိုးမရှိ၊ လယ်သိမ်းခံလယ်သမားတွေလည်း လျှော်ကြေးမရလို့ဝန်ခံထားပြီး တဘက်မှာ လက်ပန်းတောင်းဟာ စီးပွားရေးအရအမြတ်အစွန်းကျန်နိုင်ခြေရှိတဲ့၊ အနာဂတ်မျိုးဆက်အတွက်အကျိုးရှိနိုင်ခြေတွေရှိတဲ့စီမံကိန်းမို့ ဒီလို အနာဂတ်မျိုးဆက်အတွက် အကျိုးးရှိနိုင်မယ့်၊ အလုပ်အကိုင်ဖန်တီးပေးမယ့် အစီအမံတွေကိုဖော်ဆောင်နိုင်ရင်ဆက်လုပ်သင့်တယ်လို့ အကြံပြုထားတာဖြစ်တယ်။ ဒါပေမယ့် လက်ပန်းတောင်းအစီရင်ခံစာကအကြံပြုထဲ့အချက်တွေကို သက်ဆိုင်ရာအာဏာပိုင်တွေက တကယ်ဖော်ဆောင်လုပ်ကိုင်/မကိုင် စုံကော်အနေနဲ့ အာမမခံနိုင်သလို၊ နောက်ဆုံး တကယ်လုပ်ကိုင်တယ်ဆိုရင်တောင် စုံကော်ရဲ့အကြံပေးချက်ဟာ လယ်သမားတွေပေးဆပ်လိုက်ရတဲ့ပေးဆပ်မှုတွေကိုထိုက်သင့်စွာ ပြန်ကာမိစေပါ့မလားဆိုတာကလည်း
မေးခွန်းထုတ်စရာဖြစ်တယ်။ ဒီအစီရင်ခံစာကို လယ်သမားတွေကိုယ်တိုင် တချို့လည်းစိတ်ပျက်ညှိုးငယ်ပြီး၊ တချို့လည်း ဒေါသတကြီးတုန့်ပြန်ခဲ့တာက ဒီလို ထိုက်ထိုက်တန်တန် ပြန်ကာမိနိုင်ရေးကို သူတို့အယုံအကြည်မရှိတာကိုပြနေတယ်။ အလုပ်အကိုင်ဖန်တီးရေးဆိုရာမှာလည်း တသက်လုံး လယ်ပဲလုပ်လာ၊ လယ်ပဲလုပ်တတ်တဲ့လူတွေဟာ ဝမ်ပေါင်ဦးပိုင်ကုမ္ပဏီမှာ၊ ယုတ်စွအဆုံး ဝမ်ပေါင်ဦးပိုင်ကုမ္ပဏီတင်မက ဘယ်သွားသွား ဘာအလုပ်လုပ်စားတတ်မလဲ။ တခြားအလုပ်တွေအတွက် လိုအပ်တဲ့ကျွမ်းကျင်မှုကို ဘယ်သူကစီစဉ်ပေးမလဲ။ ဒါတွေကို မစဉ်းစားဘဲ အလုပ်အကိုင်ဖန်တီးပေးမယ်ဆိုတာကိုပဲ စက်ရုပ်လိုထပ်ခါတလဲလဲပြောနေတာတွေဟာ လက်လွတ်စပယ် နိုင်လွန်းလှတယ်လို့ယူဆတယ်။ 'ဦးပိုင်တို့၊ ဝမ်ပေါင်တို့ပေးတဲ့အလုပ်တွေကို ကျမတို့လုပ်မစားနိုင်ဘူး' ဆိုပြီး ဒေါ်အောင်ဆန်းစုကြည်ကို နာနာကျည်းကျည်းနဲ့ထပြောတဲ့ အမျိုးသမီးတယောက်ရဲ့အပြောက ဒီအချက်ကိုသက်သေထူနေတယ်။ နောက်တခါ တကယ်တမ်းလုပ်သင့်ရင် ရေပန်းမစားတဲ့လုပ်ရပ်တွေကိုလုပ်မှာပဲလို့ဆိုတဲ့ ဒေါ်အောင်ဆန်းစုကြည်အနေနဲ့ ကချင်မှာဖြစ်နေတဲ့စစ်ပွဲကိစ္စမှာ ဘာ့ကြောင့်ရေငုံနေလဲ၊ ရိုဟင်ဂျာတွေ မောင်းထုတ်ခံရ၊ မိထ္ထီလာမှာမွတ်စလင်တွေကို အိမ်တွေကနေမောင်းထုတ်တဲ့လုပ်ရပ်တွေမှာ ဘာ့ကြောင့် နှုတ်ဆိတ်နေလဲ။ ကိုယ့်ရဲ့ကျင့်ဝတ်ပိုင်းအရသြဇာကိုစွန့်လွှတ်ပြီးလွှတ်တော်တက်တဲ့ 
စက်ရုပ်နိုင်ငံရေးသမားဘဝကိုခံယူရင်တောင် အနည်းဆုံးကိုယ့်ဆုံးဖြတ်ချက်တွေ ရှေ့နောက်ညီဖို့ လိုတာကိုတော့သတိပြုသင့်တယ်လို့ ခေတ်မောင်းကယူဆတယ်။
လောလောဆယ်အနေအထားမှာ လယ်သမားဟာ ကိုယ့်မြေကိုယ်ပိုင်တဲ့အတွက် သူ့လယ်မှာ သူအလုပ်ဘယ်လောက်လုပ်မလဲဆိုတာ ဆုံးဖြတ်လို့ရတယ်။ ဒါပေမယ့် ဝမ်ပေါင်ဦးပိုင်အလုပ်သမားဖြစ်သွားရင် ဒီလိုဆုံးဖြတ်နိုင်ခွင့် သူ့မှာရှိမှာမဟုတ်တော့ဘူး။ ဒီတော့ တနည်းအားဖြင့် လက်ပံတေင်းစီမံကိန်းဟာ ကုန်ပစ္စည်းတိုက်ရိုက်ထုတ်လုပ်သူတွေ ကိုယ့်ဘဝရှင်သန်ရပ်တည်ရေးအတွက် ဆုံးဖြတ်ချက်တွေမှာ ကိုယ့်ရဲ့ထိန်းချုပ်နိုင်စွမ်းကို စွန့်လွှတ်ခိုင်းတာပဲ။ အရင် ကိုယ့်လက်ငုတ်နဲ့ကိုယ် လုပ်စားနိုင်နေတဲ့၊ ဆင်းရဲကောင်းဆင်းရဲနိုင်သော်လည်း စီးပွားရေးလုံခြုံမှုတနည်းတဖုံရှိနေတဲ့လယ်သမားတွေကို နိုင်ငံခြားကုမ္ပဏီတွေရဲ့လခစားဘဝကို ဖြစ်ကတတ်ဆန်းတွန်းပို့တာဟာ လူတွေရဲ့အခြေခံအကျဆုံးအခွင့်အရေးတွေဖြစ်တဲ့ မိမိဘဝမိမိပြဌာန်းပိုင်ခွင့်၊ လုံခြုံစိတ်ချစွာအသက်မွေးဝမ်းကျောင်းပိုင်ခွင့်ဆိုတဲ့ အခြေခံအကျဆုံးလူ့အခွင့်အရေးတွေကို ကျူးလွန်ဖောက်ဖျက်ခြင်းပဲ။
အခု လက်ပံတောင်းကိစ္စကို လက်ပံတောင်းက ဆန္ဒပြသူတွေနဲ့ပဲဆိုင်တဲ့ကိစ္စသက်သက်အဖြစ်မမြင်သင့်ဘူးလို့ ယူဆတယ်။ တကယ်တော့ လက်ပံတောင်းအရေးကိစ္စဟာ မြန်မာတနိုင်ငံလုံးမှာ နောက်ပိုင်းမကြာမကြာတွေ့လာရစရာရှိတဲ့ လူတန်းစားပဋိပက္ခရဲ့ ကနဦးနမူနာအဖြစ်အပျက်လို့ ခေတ်မောင်းကမြင်တယ်။ တတိုင်းပြည်လုံးနဲ့ဆိုင်တဲ့ သံယံဇာတတွေကို လူလက်တဆုပ်စာကလက်ဝါးကြီးအုပ်ပြီး တတိုင်းပြည်လုံးကပြည်သူလူထုကို လက်လုပ်လက်စားဘဝ၊ ဓနဥစ္စာအရင်းအနှီးရဲ့အစေအပါးအဖြစ်ကိုလက်ခံမှ အသက်ရှင်ရပ်တည်နိုင်မယ့်ဘဝကိုတွန်းပို့တာလို့ပဲ မြင်တယ်။ အခုဆိုရင်ပဲ လက်ပန်တောင်းလို မြေသိမ်းမှုတွေကို တခြားမြို့တွေ၊ ရွာတွေမှာပါထပ်တွေ့နေရပြီ။ ဒီလိုလုပ်ရပ်မျိုးတွေဟာ ရေရှည်မှာ တိုင်းပြည်ထဲရှိသူနဲ့မရှိသူကွာဟမှုကို ကျိန်းသေပိုကြီးစေမှာဖြစ်တယ်၊ နောက်တခါ မတရားမှုကိုကျူးလွန်ပြီး ဒီမတရားလုပ်မှုကြီးတွေကု မတရားလုပ်ခံရသူကို အတင်းမျိုချခိုင်းတာတွေဟာ ရေရှည်မှာ သာယာဝပြောတဲ့၊ တိုင်းသူပြည်သားများကို လုံခြုံစိတ်ချမှုပေးနိုင်မယ့်လူ့အဖွဲ့အစည်းကိုပေါ်ပေါက်စေမှာမဟုတ်တဲ့အပြင် ဆန့်ကျင်ဘက်အဖွဲ့အစည်းမျိုးကိုသာ ပေါ်ပေါက်စေမှာဖြစ်တယ်။ ဒီအတွက်ကြောင့်ပဲ အသိစိတ်ရှိတဲ့၊ တာဝန်သိတဲ့နိုင်ငံသားတိုင်း လူတိုင်းက လက်ပန်တောင်းနဲ့ အလားတူအရေးမျိုးကို အမျိုးသားရေးလိုသဘောထားပြီး ပူးပေါင်းပါဝင်သင့်တယ်လို့ ခေတ်မောင်းက ယူဆတယ်။

ယူတာက ဒီနေရာကဖြစ်ပါတယ် https://www.facebook.com/profile.php?id=100003826236734