ထန်ကူးကစစ်ပြေးကြီး (မနှင်းပွင့်)

ထန်ကူးကစစ်ပြေးကြီး

(ခွန်နှစ်ပုဒ်)

(၁)

ကျုပ်နာမည်လား..တုဈင်မေ တဲ့

နားသယ်အထက်နား..ဆံဖြူကွက်ကျားဖွာလန်ကြဲနဲ့..ဥစ္စာမဲ့လူအို

ဒီဒေသကိုခဏလာခိုဆဲ…ခဲမတတ်ခြေကိုတရွတ်ဆွဲလို့..ဆောင်းရက်မို့ 
အေးစက်ညို့မှိုင်းတဲ့တောင်ကတုံးမတ်မတ်..တကုံးကုံးတက်လို့မနားနိုင်ပြန်

ကျန်ကောင်းကျန်ရာဝက်သစ်ချသီး..ကောက်သင်းကောက်ခရီးထွက်ကာ

မငြိမ်းနိုင်သေးတဲ့ဘဝဆီမီးအတွက်..ကျုပ်ဝမ်းကျုပ်ကျောင်းပြီးနေတယ်

အလယ်ပိုင်းဇာတိမြေဆီက..စစ်သတင်းနားစွင့်လို့..ပြန်ခွင့်မသာသေး

နီးမလိုလိုနဲ့ဝေးပြန်တဲ့…လွင်ပြင်နွေးနွေးကိုသာ..တမ်းတရင်းဆွေးရတယ်

ဒီလိုနဲ့ဆောင်းလယ်ရောက်..သွေးမလျှောက်တော့တဲ့..လက်တွေထုံကျင်ခဲ

အက်ကွဲတဲ့နှုတ်ခမ်းလွှာဆီက...စိတ်ဒဏ်ရာနဲ့ကာယိကဝေဒနာကိုသီကြွေး

စစ်ပြေးလူအိုကျုပ်ဘဝရဲ့….ငိုချင်းပထမအပုဒ်ကို...သီချင်းလုပ်လို့ဆိုတုန်း

ဝုန်းကနဲဆို..မြောက်လေပြင်း..တောင်စောင်းထိပ်က..အရှိန်နဲ့လှိမ့်ဆင်းပြီး

ခါးသီးမှုဆားခဲတွေဆုပ်ကာ….ကျုပ်ရင်ထဲကအနာကို..ထပ်ခါတလဲပက်ကြဲတယ်…။

(၂)

အရိုးရှည်ရှည်နဲ့သစ်ဖြူသားလက်ကိုင်တပ်တဲ့တူရွင်း..အဲဒါကျုပ်ထမင်းရှင်ပေါ့

ဒီခေတ်ကြပ်ကြီးမတော့..သူနဲ့သာတူးကာဆွကာနဲ့ အားကိုးရာရရှာပေတယ်

သို့ပေမယ့်ကွယ်..ဆိုသာဆိုရ..တောင်ခါးပန်းနှင်းပြင်ထုအောက်ကပိန်းညှောက်

ချွေးပေါက်ပေါက်ကျအောင်ယက်တာတောင်..ခေါင်းမာမာနဲ့ထွက်မလာပေဘူး

မထူးလှမှန်းသိလဲ...ဝတ်ရုံပြဲတိုတိုကိုအကြိမ်ကြိမ်ဆွဲချ..နှင်းခဲတွေကတောင်လိုပုံ

မလုံ့တလုံခြေထောက်တွေ…ပုပ်ကြွေမလိုညိုမဲလာ…နောက်ဆုံးမှာတူရွင်းဆွဲလို့

လက်ဗလာပဲအိမ်ပြန်လာခဲ့ရတယ်…ဒီနေ့အဖို့စားစရာရှာလို့မရခဲ့ဘူး ကွယ်တို့ရယ်

ပြောင်သလင်းခါနေတဲ့အခန်းကျဉ်းအလယ်မှာ..ဝမ်းဟာဟာနဲ့ငိုရှာတဲ့အိမ်သားတစု

ဒုတိယမ္မိငိုချင်းကို..ကျုပ်ရင်ထဲကဆွဲထုတ်လို့အသက်သွင်း..ဆို့နင့်စွာဆိုညည်းမိချိန်

အိမ်နီးပါးချင်းများကိုပါကူးစက်…အငတ်ဘေးရ့လောကဓံတေးကို..တူတူဆိုလို့ ငိုမိကြတယ်….။

(၃)

တနယ်တကျေး..အဝေးကညီများလဲ..သရောကြီးခိုင်းတဲ့ထဲ မရှောင်နိုင်ပဲရှိရှာပေလိမ့်

ကြိတ်မှိတ်လို့ရှင်သန်..အငတ်ဒဏ်ကိုကြံ့ကြံ့ခံကာ..ဘယ်တယောက်များကျန်ရှာမလဲ

ကွဲခဲ့တာကြာ..ကြာလွန်းလှပြီလေ..ဘဝဇာတ်ဆရာထားရာမှာနေ စေရာသွားရတဲ့အခါ

ညီတို့နေရာအလှမ်းကွာဝေးလိုက်ပုံများ…သွားရမယ့်လမ်းတွေက..မဆုံးအောင်ရှည်လျား

ရန်သူ့မြင်းသမားတွေကြောင့်..ဖုန်တွေမည်းပိတ်ကာဝေဝါးဝါးနဲ့မို့..ကမ္ဘာခြားသလိုထင်ရ

တသသနဲ့ကျုပ်မှာလေ..ကြိုးကြာနဲ့ငန်းရိုင်းတို့..နေရာပြောင်းဖို့..ဖြတ်ပျံကြတိုင်းမျှော်ငေး

ရပ်ဝေးတနေရာ..ညီတို့ရွာကို..ဝေဟင်ခရီးလေဟုန်စီးလို့..သင်တို့နဲ့ခရီးကြုံလိုက်စမ်းချင်လှ..

တတိယတမ်းချင်း..လွမ်းရင်းနဲ့ဆို..အကို့ညီတွေတယောက်တကွဲ..နေရာအနှံ့ပြန့်ကြဲရှာလို့

ဘယ်ဆီများရောက်..အကိုဒီမှာသေပျောက်ခဲ့ရင်..အရိုးတောင်လာကောက်နိုင်ကြပါ့မလားဟင်..။

(၄)

လင်သေရှာတဲ့ကျုပ်နှမအထွေး..သနားစရာအဖမဲ့ကလေးတပြုံတမနဲ့..ချွန်လီမှာနေကြတယ်

အရိပ်ကွယ်လေတဲ့နှမငယ်ဆီ.. ရည်ရွယ်ရင်းမရောက်ဖြစ်တာ..ဆယ်နှစ်သာတင်းတင်းပြည့်ရော

တဝေါဝေါစီးလို့နဂါးလိုခွေ..တို့တွေကိုခြားထားတဲ့မြစ်မင်း“ဟွေ”က ရှည်လွန်းလှလို့..အပြစ်မရှာ

အကိုသာလာချင်ရင် အနီးလေး..လှေကလေးရွက်ဖွင့်လို့ရောက်သင့်ပါရဲ့..လို့များဆိုနေရှာမလား

မြှားမိုးရွာကာ..ကြည့လေရာစစ်တံခွန်လွှင့်တဲ့..ညည်းတို့တောင်ပိုင်းကို..အကိုမလာဝံ့ဘူးကွယ်

ခွင့်လွှတ်တော့..နှမရေ့..တို့တွေပြန်မှတွေ့ပါမလားတွေးရင်း…ငိုချင်းစတုတ္တအပိုဒ်ကိုမျက်ရည်နဲ့ဆို

မင့်အကိုလူကြောက်ကြီးရဲ့အလွမ်းတေး..တောမျောက်တို့ပူဆွေးသံနဲ့ရောထွေးလို့ညံတယ်……။

(၅)

လေထန်တဲ့တောင်ကုန်းတွေပတ်လည်ဝိုင်းလို့..ချောင်းငယ်တို့လဲတဝုန်းဝုန်းရေလျှံကြတဲ့ဒီအရပ်မှာ

ထစ်ချုန်းမိုးအေးစွေရွာတိုင်း…အရိုးပြိုင်းပြိုင်းနဲ့သစ်တောညို့မှိုင်းခမျာ…နူးပျော်ကာတစက်စက်ကျ

တောင်အောက်ကချုံဝါများ...ရှေးမြို့ဟောင်းကြားခဲခဲလှုပ်လို့..တိမ်မည်းပုပ်တို့ကပြိုမယောင်ယောင်

နဝေတိမ်တောင်နဲ့မြေခွေးအဝါကောင်ကခြေချုပ်မိသလိုရပ်ရာ.. အဖြူကလေးသာခုန်လွှားလို့ပြေး

အတွေးဝင်မိ.အထီးကျန်ခြင်းအတိနဲ့ဒီတောင်ကြားမှာ.ဘာကြောင့်များကျုပ်ဘဝဇာတ်မြှုပ်ဖို့ဖြစ်လာရ

ညများဆိုအိပ်ရာကထထိုင်..ဇောချွေးဖြိုင်ကာထောင့်တထောင့်မှာငိုင်ငေး..အတွေးများနဲ့စစ်ခင်းဆဲ

ကျုပ်လိပ်ပြာလဲလွင့်ရှာလို့ဟိုအဝေး..သူ့ခန္ဓာပြန်ခွင့်မသာသေးတဲ့…ရွာဟောင်းကအိမ်အိုကလေးဆီ

ရောက်လုပြီထင်ပါ့..ပဉ္စမငိုချင်းရှည်..ဆိုရင်းလေနှုတ်ဆက်..ကျုပ်အတွက်နဲ့သူ့ကိုချုပ်မထားရက်နိုင်လို့

ပြန်မခေါ်စို့နဲ့ကွယ်..လှည့်လာမယ်မဟုတ်.ကျုပ်လိပ်ပြာကျုပ်သိပါရဲ့..မဲဇာကိုချန်ခဲ့ကာအိမ်ပြန်နှင့်ရှာပြီ.။


(၆)
ကောင်းကင်ကိုထိမှီမတတ်..အပင်အိုမတ်မတ်များရဲ့..ငွေအကိုင်းအခက်တို့..လွန်းတင်ယှက်ရာ

ဒက္ခိဏအရပ်တနေရာက..စိမ်းလဲ့ကြည်သာတဲ့ရေအိုင်ငယ်ဟာ..နဂါးတကောင်စံမြန်းရာနန်းပေါ့

ရာသီပြောင်းလို့ရွက်ဝါဟောင်းတွေ..တဖွဲဖွဲကြွေတဲ့ကြားထဲ..နဂါးကတော့မလှုပ်မယှက်သာနေမြဲ

အရှေ့အရပ်ထဲကအဆိပ်ပြင်းတဲ့မြွေဆိုးတသင်း..အတင့်ရဲစွာချဉ်းကပ်လို့လာ..ဘယ်လိုများပါလိမ့်

အံသြစိတ်နဲ့ဓါးလွတ်သာဆွဲထုတ်..ခုတ်ဖို့ရာမစွမ်းနိုင်ဆဲ..ဝေခွဲမရစွာနဲ့ကျုပ်ဆိုမိတဲ့ဆဌမတေးသံ

လေနွေးနွေးထဲလွင့်ပျံကာကျန်နေဆဲ..တောင်ကြားနဲ့စမ်းချောင်းများထံ..နွေဦးတဖန်ပြန်လာခဲ့တယ်..။

(၇)

ဆိုတော့ကွယ်…သရောကြီးခိုင်းတဲ့သုံးနှစ်လုံးလုံး..တောပိုင်းမှာပုန်းခဲ့ရတဲ့..ကျုပ်လိုဒုက္ခသည်လူအို

စစ်ပြေးစာဆိုတယောက်မှာတော့..အရွယ်ကထောက်လို့လာ…ကျော်ကြားမှုနဲ့နေရာပျောက်ကွယ်ဆဲ

ရွှေမြို့တော်ထဲမှာမင်းပျိုမင်းလွင်တို့သာကြီးစိုး…ရာထူးဂုဏ်တွေတိုးကာ…ဓနကြွယ်သထက်ကြွယ်လို့

ကျုပ်မိတ်ဆွေအပေါင်းပညာရှိဟောင်းတို့ခမျာ..ခိုရရှာဆဲတောင်ရိပ်မှာ..အတိတ်ကရွှေထီးအကြောင်း

ပြန်ပြောင်းလို့တမ်းတစဉ်…ရင်ထဲကဒဏ်ရာအနာရွတ်တွေပေါ်…ချွတ်နင်းကာကျော်သွားကြတုန်း

သတ္တမသီချင်းအဆုံးကိုခပ်တိုးတိုးဆိုရင်း..ဆောလျင်စွာနေဝင်ခြင်းကိုသာ..ရင်နာနာနဲ့ငေးမိတယ်….။

မနှင်းပွင့်

(ယူတာက)http://www.kaungkin.com/index.php?option=com_content&view=article&id=681:2012-01-01-12-35-45&catid=40:2009-04-17-01-31-04&Itemid=70