ကျေးဇူးတင်စရာမလိုပါ။
နိုင်ငံရေးအကျဉ်းသားများကိုလွှတ်ပေးတဲ့အတွက် ဗိုလ်သိန်းစိန်ကိုကျေးဇူးတင်ကြောင်းပြောသံတွေကြားနေရလို့ သိပ်အံ့သြမိပါတယ်။
နံပတ်တစ်- ဗိုလ်သိန်းစိန်တို့က ယုံကြည်ချက်ကြောင့်အကျဉ်းကျနေသူတွေကို သာမန်ရာဇ၀တ်သားလို့ပဲ အသိအမှတ်ပြုပါတယ်။ နိုင်ငံရေးအကျဉ်းသားလို့ အသိအမှတ်မပြုပါ။ လွှတ်တုန်းကအဲဒီအတိုင်းအတိအကျပြောခဲ့ပါတယ်။ ဒါဟာပေါ့ပေါ့တန်တန်ကိစ္စမဟုတ်ပါ။ ဘယ်လိုပဲကိုယ့်ကိုသတ်မှတ်-သတ်မှတ် လွတ်တာလိုရင်းပဲလို့ဆိုလို့မဖြစ်ပါ။ သူတို့တတွေ မလွှတ်မဖြစ်လို့ လွှတ်ရတယ်ဆိုတာအားလုံးသိပါတယ်။ ဒါကိုပဲ ဗိုလ်သိန်းစိန်တယောက် စိတ်သဘောထားကြီးပေတယ်လို့ ထောမနာပြုနေကြတာဟာ အံ့သြ၀မ်းနည်းစရာကောင်းပါတယ်။ ကိုယ့်ကိုရိုက်တဲ့တုတ်ကို ကိုယ်ကပြန် ဦးတိုက်နေရတာနဲ့တူပါတယ်။
နံပတ်နှစ်- လွှတ်ပေးသူကိုကျေးဇူးတင်တယ်ဆိုတာ ကိုယ်ကအပြစ်ရှိမှကျေးဇူးတင်ရတာပါ။ ကျွန်တွေကို တခြားကျွန်ပိုင်ဆီက၀ယ်ပြီး လွှတ်ပေးတာမျိုးဆိုရင် ကျေးဇူးတင်ကောင်း တင်ရပါတယ်။ ဒါပေမဲ့အခုဟာက သူတို့ကအပြစ်မရှိပဲ ဖမ်းဆီးချုပ်နှောင်နှိပ်စက်ခဲ့တာပါ။ အရင်အစိုးရလက်ထက်လို့ပြောရင် အဲဒီတုန်းက၀န်ကြီးချုပ်ကြီးဟာ ဘာလို့နှုတ်ဆိတ်နေတာလည်း မေးစရာရှိပါတယ်။
ဗိုလ်သန်းရွှေတို့လုပ်တာကို သူကမကြိုက်မနှစ်သက်ပေမယ့် မတတ်သာလို့အောင့်နေခဲ့တာလို့ ဘယ်သူများပြောနိုင်ပါသလဲ။
နံပတ်သုံး- နှစ်ပေါင်းများစွာအပြစ်မရှိချုပ်နှောင် နှိပ်စက်ခဲ့တာတွေကိုမေ့ပစ်ရတော့မှာလား။ ထောင်ထဲမှာ၊ ထောက်လှမ်းရေးမှာ နှိပ်စက်တယ်ဆိုတာ ဘယ်လောက်လူမဆန်၊ ယုတ်မာရိုင်းစိုင်းရက်စက်တယ်ဆိုတာ ခံခဲ့ရသူတိုင်းကောင်းကောင်းသိပါတယ်။ အဲဒီလိုနှစ်ပေါင်းများစွာခံခဲ့ရတာတွေအတွက် သူတို့ကိုကျေးဇူးတင်တာလား။
သမတကြီးဗိုလ်သိန်းစိန်ဟာ လွှတ်ချင်တယ်ဆိုရင်ဘာဖြစ်လို့သူသမတဖြစ်တာနဲ့ အမြန်ဆုံးမလွှတ်တာလဲ။ ပထမအသုတ် လွှတ်တုန်းက ဘာဖြစ်လို့ ဒုတိယအသုတ်ကလူတွေကို မလွှတ်တာလဲ။ သူများနိုင်ငံမှာဆိုရင် ထောင်ထဲမှာ ရက်တရက်လွန်ချုပ်ရင် အစိုးရကိုတရားစွဲလို့ ရပါတယ်။
ဒီမှာကျတော့ ကျေးဇူးတောင်တင်နေရသေးပါကလား။
နံပတ်လေး- ပိုအရေးကြီးတဲ့အချက်က ပြည်သူလူထုကြီးအနေနဲ့ ဗိုလ်သိန်းစိန်တို့ကို နောင်မှာနိုင်ငံရေးအယူအ ဆမတူသူတွေကို မဖမ်းဆီးမချုပ်နှောင်တော့ပါဘူးလို့ ကတိအာမခံချက်ပေးခိုင်းကြပါ။
ဒီလိုမှမဟုတ်လို့ကတော့ အရင်အာဏာရှင်အဆက်ဆက်လိုပဲ ဖမ်းလိုက်-လွှတ်လိုက်-ဖမ်းလိုက်- ထောင်ထဲမှာသေ သွားလိုက်- ဒီသံသရာက လွတ်မှာမဟုတ်ပါဘူး။
0 comments:
Post a Comment