ဂန္ဒီစစ်တမ်း (ရေးသူ-ကွန်မြူနစ်ခေါင်းဆောင် ကိုဗဟိန်း)

ဂန္ဒီစစ်တမ်း (ရေးသူ-ကွန်မြူနစ်ခေါင်းဆောင် ကိုဗဟိန်း)လွတ်လပ်ရေးလုပ်ငန်းကို ဂန္ဒီကြီး စွမ်းစွမ်းတမံရှေ့ဆောင်ပြုလုပ်ခဲ့ရာ၌ အကောင်းအဆိုး(သို့မဟုတ်)အနှေးအမြန် ဆန်း စစ်ဝေဖန်၍ ပြထားသည်။ ဂန္ဒီစစ်တမ်းဆိုရာ၌ ပုဂ္ဂိုလ်စွဲအားဖြင့် ဂန္ဒီ၏အထ္ထုပတ္တိဖြစ်စဉ်ကို စစ်ဆေး(သို့မဟုတ်)နိုင်ငံရေးတွင် ဂန္ဒီ၏အမြင်၊ ဂန္ဒီ၏ ဝါဒ။ ဂန္ဒီ စနစ်(Gandhism) ကို ဝေဖန်စစ်ဆေးဖို့ဖြစ်၏။ ယနေ့အိန္ဒိယပြည်တွင် ဂန္ဒီထက်အရေးပါအရာရောက်သူ ဟူ၍ မရှိ။ ဂန္ဒီမှာ သန်းပေါင်း (၃၅ဝ) ကျော်မျှ (ကမ္ဘာ့လူဉီးရေ၏ ၅ ပုံ ၁ ပုံခန့်)သောကုလားများ၏ သရဖူမဆောင်းသောဘုရင်ဟု ခေါ်နိုင်၏။ အလွန်အရေးပါသောကွန်ဂရက်ကြီး၏ ဥက္ကဌကုလားထိုင်တွင် သူထိုင်စေချင်သူမှ ထိုင်ရ၏။ အများမဲဆန္ဒဖြင့်ဥက္ကဌဖြစ်လာသော ဆူဘတ်ချန္ဒရာဘို့စ်သည် ဂန္ဒီအကြိုက်ကိုမလိုက်သဖြင့် ဥက္ကဌအဖြစ်မှလျှော့သွားရ၏။ ယခုအခါ တကမ္ဘာလုံးက ကုလားများအာဏာဖီဆန်ရေးတိုက်ပွဲစတော့မည်မှာ ယနေ့လား, မနက်ဖြန်လားဟု ဂရုတစိုက်မျှော်လင့်နေကြ၏။ အာဏာဖီဆန်ရေးကြေညာရန်အတွက် ခလုတ်မောင်းမှာ ဂန္ဒီ၏လက်ထဲတွင်ရှိ၏။ ဂန္ဒီလက်တခါလှုပ်လျှင် အိန္ဒိယပြည်သည်ဗြောင်း ဆန်အောင်ဆူပွက်သွားပေအံ့။ သို့သော် အရေးကြီးဆုံးအချက်ကား ဂန္ဒီသည် တကယ် အာဏာဖီဆန်ရေးကိုကြေညာမည်လော။ ဂန္ဒီ၏ခေါင်းဆောင်မှုဖြင့် ကုလားများ တကယ် လွတ်လပ်ရေးရမည်လော။ ဤမေးခွန်းများမှာ ကုလားများအတွက်သာ အရေးကြီးသည်မဟုတ် ဗမာများအတွက်လည်း အလွန်အရေးကြီး၏။ လွတ်လပ်ရေးအတွက် ဆူပွက်နေသောကုလားပြည်၊ လွတ်လပ်ရေးရသွားပြီဖြစ်သောကုလားပြည်တို့သည် ဗမာပြည်၏လွတ်လပ်ရေးတိုက်ပွဲ၊ ဗမာပြည်၏နောင်ရေးကိုမည်မျှပြုပြင်ပြောင်းလဲပေးမည်ကို စဉ်းစားကြည့်နိုင်၏။ ကုလားပြည် တွင်ပြောင်းလဲနေသမျှတို့ကို ဗဟုသုတသက်သက်ထက် ဗမာ့လွတ်လပ်ရေးကြိုးပမ်းမှုအတွက် အမြင်မှန်မြင်ဖို့အရေးကြီး၏။ ယခုဆောင်းပါးတွင်ရေးသမျှတို့မှာ ဤရည်ရွယ်ချက်ကိုအရင်းခံထား၍ ရေးသားခြင်းဖြစ်၏။
ဂန္ဒီမှာပုဂ္ဂိုလ်ထူးဖြစ်၏။ ကုလားများသာမက တကမ္ဘာလုံးကပင်ကြည်ညိုလေးစားခြင်းခံရသူဖြစ်၏။ "အာရှတိုက်အတွင်းရေး" ကို ရေးသူ ဂျွန်ဂန်းသားက ဗုဒ္ဓမြတ်စွာဘုရားနောက် ဂန္ဒီသည် တန်ခိုးအကြီးဆုံးကုလားတစ်ယောက်ဖြစ်သည်ဟုရေး၏။ ဂန္ဒီ၏ကိုယ်ကျင့်တရား၊ ဂန္ဒီ၏စိတ်ထားမြင့်မြတ်ပုံတို့မှာ လူတိုင်းကြည်ညိုစရာပင်ဖြစ်၏။ သို့သော် နိုင်ငံရေးအားဖြင့်သရုပ်ခွဲရာ၌ ပုဂ္ဂိုလ်စွဲအားဖြင့်ကြည်ညိုမှု, ရိုသေ ကိုင်းရှိုင်းမှုတို့သည်ပေါ်ပေါက်လာရန်အကြောင်းမရှိပေ။
ဂန္ဒီဝါဒ-ဂန္ဒီစနစ်ဟူ၍ရေးသားရာ၌ အခြားဓနရှင်ဝါဒ, နယ်ချဲ့ဝါဒ, ဘုံဝါဒစသည်တို့ကဲ့သို့ ဂန္ဒီဝါဒဟူ၍သတ်သတ်ခွဲခြားပြောဆိုနိုင်သလော ဟူသောအမေးမျိုးပေါ်ပေါက်နိုင်လေသည်။
ဂန္ဒီဝါဒ၏ အခြေခံတရား (၃) ပါး
ဂန္ဒီဝါဒဟူ၍ ဝါဒတခုသတ်သတ်အဖြစ် ခေါ်ဝေါ်ရေးသားနိုင်၏။ ဂန္ဒီ၏ဝါဒအခြေခံတရား (၃) ပါးကား -
1. သစ္စာတရား (Truth)
2. မေတ္တာတရား။ (non-violence) မည်သူ့ကိုမဆိုမေတ္တာထားရမည်။ ရန်သူကိုပင် အကြမ်းဖက်၍ သတ်ဖြတ်ညှဉ်းဆဲခြင်းဖြင့်မအောင်ရ။
3. တပတရား (Renunciation) မိမိကိုယ်ကို ခြိုးခြံစွာကျင့်ကြံနေထိုင်ရမည်
ဤအခြေခံတရားများမှာ စင်စစ်အားဖြင့် ရှေးဟိန္ဒူဘာသာတရားမှ ထုတ်နှုတ်ယူငင်ထားချက်များပင်ဖြစ်သည်။ ကွန်ဂရက်၏ လွတ်လပ်ရေးတိုက်ပွဲပရိယာယ်ဖြစ်သော အကြမ်းမဖက်အနုသက်သက်နည်းဖြင့်အာဏာဖီဆန်ရေး စသည်တို့မှာ ဂန္ဒီဝါဒ၏မေတ္တာ တရားအရဖြစ်သည်။ ဤတိုက်ပွဲမျိုးကို ဂန္ဒီဝါဒအရ သစ္စာဂျဟတိုက်ပွဲဟုခေါ်သည်။ တပတရားအရ မိမိကိုယ်ကိုခြိုးခြံစွာနေထိုင် ရမည်ဟူရာ၌ ဂန္ဒီဝါဒသည် ယခုစက်ကိရိယာခေတ်ကိုအလွန်မုန်းတီး၍ လူတိုင်း ကိုယ်ဝတ်သောအဝတ်ကို ကိုယ်တိုင်ရက်ဝတ် သည့်ခေတ်၊ ကျေးလက်စီးပွားရေးစနစ်ခေတ်ကို ပြန်လည်ထူထောင်ရန် ရည်ရွယ်သည်။ ဤတရား (၃) ပါးကိုအခြေခံထားသော ဂန္ဒီဝါဒသည် လွန်ခဲ့သည့်အနှစ် (၂ဝ)ခန့်က စတင်ပေါ်ပေါက်လာလေရာ ထိုအချိန်ကစ၍ အိန္ဒိယပြည်သည် ခေတ်တခေတ်သို့ ကူးပြောင်းလာပြီဟုဆိုနိုင်လေသည်။ နိုင်ငံရေးမှာ ပညာတတ်တိုင်းရင်းသားဓနရှင်တို့၏ အပျင်းပြေလုပ်ငန်းမျိုးမှ ကုလားဆင်းရဲသားလူထုကြီးတခုလုံး နိုးကြားထကြွလာကာ ဗြိတိသျှနယ်ချဲ့စနစ်ကိုတိုက်ဖျက်သည့် လုပ်ငန်းကြီးဖြစ်လာလေသည်။ ဂန္ဒီဝါဒသည် ကုလားဆင်းရဲသားထုကြီးအား နိုင်ငံရေးအမြင်သန်လာအောင်လုပ်နိုင်ခြင်းမှာ ဂန္ဒီဝါဒ၏ အခြေခံတရားများကြောင့်လော၊ ခေတ်ပေါ်နိုင်ငံရေးကို ရှေးဆန်သောဘာသာတရား၊ ကိုယ်ကျင့်တရားစသည်တို့ဖြင့်ပေါင်း စပ်ပေး၍လော။ ဤသို့ကား မဟုတ်ပေ။
ဂန္ဒီဝါဒနှင့် ပထမအကြိမ်အာဏာဖီဆန်ပွဲ ၁၉၂ဝ ခု
ဂန္ဒီဝါဒ၏ ရေးပုံ၊ သုံးနှုန်းပုံတို့မှာ ရှေးဆန်လှသော်လည်း စင်စစ်အားဖြင့် ကမ္ဘာစစ်ကြီးပြီးသည့်နောက် မကျေမနပ်ဆူပွက်လျက်ရှိသော ကုလားဆင်းရဲသားထုကြီးကိုနှိုးဆွကာ ခေါင်းဆောင်ခဲ့လေသည်။ နယ်ချဲ့အစိုးရမှာ မိစ္ဆာအစိုးရဖြစ်၍ မိစ္ဆာအစိုးရနှင့်မဆက်ဆံရေးဟုဆိုကာ နယ်ချဲ့စနစ်ကိုတိုက်ဖျက်လိုသောဆင်းရဲသားလူထုကြီးအား အစိုးရနှင့်မဆက်ဆံရေး, အာဏာဖီဆန်ရေးလုပ်ငန်းကို စတင်စေခဲ့လေသည်။ ဂန္ဒီ၏စေ့ဆော်ချက်အရ ကွန်ဂရက်၏ကြွေေးကြော်သံသည် ရွာသိမ်ရွာငယ်မကျန် ကုလားပြည်တခုလုံးပြန့်နှံ့သွားကာ သန်းပေါင်းများစွာသော ကုလားဆင်းရဲသားလူထုကြီး ကွန်ဂရက်အလံအောက်သို့ခိုဝင်လာကြခြင်းဖြင့် ကွန်ဂရက်မှာ ပထမဆုံး ကုလားတပြည်လုံး၏ အသင်းကြီးဖြစ်လာလေသည်။ ဂန္ဒီကိုယ်တိုင်အဖမ်းခံရစဉ်က ဂန္ဒီက အစိုးရနှင့်မဆက်ဆံရန်ဟောပြောသည်မှာမှန်ကြောင်း ရဲဝံ့စွာဝန်ခံ၍ ကုလားလူမျိုးတမျိုးလုံး လူစဉ်မမှီအောင်မွဲပြာကျရခြင်းမှာ မိစ္ဆာအစိုးရကြောင့်ဖြစ်ကြောင်းနှင့် အစိုးရအားရှုံ့ချပြော ဆိုလေသည်။ သို့သော် ဂန္ဒီဝါဒ၏ ကြီးစွာသောချို့ယွင်းချက်မှာ ထိုအခါကပင်ထင်ရှားခဲ့လေသည်။ ဂန္ဒီဝါဒသည် နယ်ချဲ့စနစ်ကို၏ ဖြိုဖျက်ရန်မရည်ရွယ်ပေ။ ဖြိုဖျက်၍မရဟူ၍အယူရှိပြီး အကယ်၍ဖြိုဖျက်ရသည့်တိုင်အောင် အင်နဲ့အားနှင့်အကြမ်းပတမ်းဖက်ခါ ဖြိုဖျက်စရာမလိုဟုယုံကြည်လေသည်။ ဂန္ဒီဝါဒ၏စွဲမှတ်ချက်ကား ကုလားဆင်းရဲသားထုကြီးကို ဆင်းရဲစေ, မွဲစေသောနယ်ချဲ့ စနစ်အား မေတ္တာတရားဖြင့်စိတ်ပြောင်းအောင်လုပ်နိုင်သည်ဟူသော စွဲမှတ်ချက်ပင် ဖြစ်လေသည်။
နောက်လိုက် ကုလားဆင်းရဲသားထုကြီးကား ဖော်ပြပါဂန္ဒီဝါဒ၏ချို့ယွင်းချက်ကြီးကို မမြင်။ အာဏာဖီဆန်ရန် ဂန္ဒီကအချက်ပေးလိုက်ခြင်းဖြင့် နယ်ချဲ့စနစ်တိုက်ဖျက်ရေးအတွက် တကယ့်အရေးတော်ပုံကြီးစပြီဟုသာယူဆကြကာ မိမိတို့လွတ်လပ်ရေးအတွက် ယမ်းကုန်, မီးကုန်ကြဲကြလေတော့သည်။ ဂန္ဒီကား နောက်လိုက်များမှာ မိမိလှမ်းစေချင်သည်ထက် ခြေတလှမ်း သွက်သွက်ကြီးလှမ်းနေသည်ကိုမြင်လာကာ ကြာလျှင်မအုပ်စီးနိုင်ဘဲ မိမိလက်မှလွတ်ထွက်ကုန်မည်ကိုစိုးရိမ်လာပြီးလျှင် ချောင်ရီချောင်ရာဟူသောရွာကလေးတွင် ရွာသူ, ရွာသားများက ပုလိပ်သားများအပေါ်အကြမ်းဖက်သည်ကိုအကြောင်းပြု၍ အိန္ဒိယတပြည်လုံး၏အာဏာဖီဆန်မှုကြီးကိုရပ်စဲရန် အမိန့်ပေးလိုက်လေသည်။ ဂန္ဒီ၏နိုင်ငံရေးပန်းတိုင်မှာ နယ်ချဲ့စနစ်တိုက်ဖျက်ရေး, တကယ့်လွတ်လပ်ရေးမဟုတ်။ ကနေဒါ၊ သြစတြေးလျတို့ကဲ့သို့ နယ်ချဲ့စနစ်လက်အောက်ခံ ဒိုမီနီယံအခြေသာဖြစ်ကြောင်း ဂန္ဒီ၏နိုင်ငံရေးလက်နက်မှာလည်း အင်နှင့်အားနှင့် ဖိ၍တိုက်သောအရေးတော်ပုံလုပ်ငန်းမျိုးမဟုတ်ဘဲ လူအားပြ၍ နယ်ချဲ့စနစ်နှင့် ဈေးဆစ်ခြင်းမျိုးသာဖြစ်ကြောင်းတို့မှာ ထိုအချိန်ကပင်ထင်ရှားခဲ့လေသည်။
ဂန္ဒီဝါဒနှင့်တိုင်းရင်းသားဓနရှင်များ
ဂန္ဒီဝါဒ၏ ပထမအဆင့် (၁၉၂ဝ)ခုတွင်ပင် တိုင်းရင်းသားဓနရှင်များသည် ဂန္ဒီ၏အောက်သို့ ခိုဝင်လာကြလေသည်။ ပထမတွင်ကား ဂန္ဒီ၏ ဆင်းရဲသားလူထုကြီးအားနှိုးဆွပေးချက်၊ စက်မှုကိရိယာကိုရှုံ့ချချက်တို့မှာ တိုင်းရင်းသားဓနရှင်တို့တုန်လှုပ်ချောက် ချားစေခဲ့သော်လည်း ဂန္ဒီမှာ ဆင်းရဲသားများအားလှုပ်ရှားနိုးကြားစေနိုင်သလောက် ၄င်းတို့ထင်သလို မလှမ်းနိုင်အောင် ခြေချုပ် ထည့်နှိုင်သည်ကိုသိလာကြသောအခါ ဂန္ဒီသာလျှင်၎င်းတို့၏ခေါင်းဆောင်, ၄င်းတို၏လူတန်းစားအကျိုးအတွက်ဆောင်ရွက် မည့်ပုဂ္ဂိုလ်ဖြစ်ကြောင်း မြင်လာလေသည်။ ဂန္ဒီ၏ လူတန်းစား တတန်းစားနှင့်တတန်းစားသင့်မြတ်ရေး၊ အလုပ်သမားများ၏ တရားသောသပိတ်မှောက်မှုများကိုရှူံချချက်နှင့် ဓနရှင်တို့၏ပစ္စည်းကို ကာကွယ်ပေးရေးစသည်တို့မှာ ဂန္ဒီဝါဒနှင့်တိုင်းရင်းသား ဓနရှင်တို့ ပိုမိုပူးပေါင်းဖို့ဖန်တီးပေးလေသည်။ ဂန္ဒီ၏ လက်ရက်ကန်းအားပေးရေး လုပ်ငန်းမှာလည်း တိုင်းရင်းသားဓနရှင်တို့၏ စက်ရုံထွက်အထည်အလိပ်လုပ်ငန်းကို ပြိုင်ဆိုင်ရာမရည်ရွယ်။ စက်ရုံထွက်အထည်အလိပ် မဝယ်နိုင်သော အလွန်ဆင်းရဲ ငတ်မွတ်ခေါင်းပါးနေသည့်တောရွာများအတွက်သာရည်ရွယ်ကြောင်း တိုင်းရင်းသား ဓနရှင်တို့သိလာကြလေသည်။ ထိုအချိန်ကစ၍ တိုင်းရင်းသားဓနရှင်၊ လယ်ပိုင်ရှင်တို့သည် ကွန်ဂရက်အတွင်းသို့ဝင်လာကြ၍ ကွန်ဂရက်၏ရန်ပုံငွေမှာလည်း အဆမတန် တိုးတက်လာလေသည်။
ဂန္ဒီဝါဒမှာ တိုင်းရင်းသားဓနရှင်လူတန်းစား၏အကျိုးဆောင်အဖြစ်သို့ လုံးလုံးလျားလျားပြောင်းလဲလာသည့်အချိန်ကား (၁၉၂၉ - ၃ဝ) ခု။ ကမ္ဘာ့စီးပွားပျက်ကပ် ဆိုက်ရောက်ချိန်ဖြစ်လေသည်။ ထိုအချိန်တွင် ဗြိတိသျှဓနရှင်များမှာ စီးပွားပျက်ကပ်ကြောင့် အထူးထိခိုက်ခြင်းခံရလေရကား ဗြိတိသျှဓနရှင်တို့သက်သာချောင်ချိရေးအတွက်စီမံသမျှတို့မှာ ကုလားတိုင်းရင်းသားဓနရှင်တို့ကို များစွာထိခိုက်လေတော့သည်။ အိန္ဒိယထွက်ကုန်များအားကာကွယ်ပေးရန်ငြင်းဆိုချက်၊ ဗြိတိသျှကုန်စည်များအား အရေးပေးချက်၊ အိန္ဒိယထွက်ဝါဂွမ်းအပေါ် အကောက်ယူချက်၊ ကုလားငွေတကျပ်ကို အင်္ဂလိပ်ငွေ တသျှီလင် ခြောက်ပဲနိဟုသတ်မှတ်ချက် တို့မှာ ဗြိတိသျှနယ်ချဲ့စနစ်၏ချုပ်ချယ်ချက်များဖြစ်လာ လေသည်။ ထိုအချိန်တွင် အဝတ်အစားဈေးကြီးမှု၊ လယ်ထွက်ပစ္စည်းဈေး ကျမှုတို့မှာ အလုပ်သမားလယ်သမားတို့အား များစွာထိခိုက်စေရကား တိုင်းပြည်တခုလုံးရှိဆင်းရဲသားထုကြီးမှာလည်း ထပ်မံ လှုပ်ရှားလာပြန်လေသည်။ အလုပ်သမားများ၊ လယ်သမားများ၏အစည်းအရုံးများလည်း အနှံ့အပြားပေါ်ပေါက်လာကြကာ အလုပ်သမားများ၏သပိတ်မှောက်မှုများ၊ လယ်သမားများနှင့်လယ်ရှင်တို့စကားများမှုများဖြင့်လည်း ဆင်းရဲသားထုကြီးမှာ မိမိတို့လူတန်းစားသက်သာချောင်ချိရေးအတွက် တိုင်းရင်းသားဓနရှင်, လယ်ပိုင်ရှင်တို့နှင့် အတိုက်အခံလုပ်လာလေသည်။

ဂန္ဒီဝါဒနှင့် ဒုတိယအကြိမ် အာဏာဖီဆန်ပွဲကြီး ၁၉၃ဝ
ဘေးကြပ်နံကြပ်ကျနေသောတိုင်းရင်းသားဓနရှင်များမှာ ဂန္ဒီဝါဒကိုသာလျှင်အားကိုးအားထားရှိလေတော့သည်။ ဒုတိယအကြိမ် အာဏာဖီဆန်ပွဲကြီးမစမီ မဟတ္တမဂန္ဒီသည် တောင်းဆိုချက် (၁၁)ချက်ပါသောစာတစောင်ကို ဘုရင်ခံချုပ်သို့ ပေးလိုက်လေသည်။ ထို (၁၁) ချက်မှာ တိုင်းရင်းသားဓနရှင်လူတန်းစားများအတွက်သာဖြစ်၍ ထိုအချိန်က အထူးနိုးကြားထကြွနေသောအလုပ်သမား, လယ်သမားတို့၏ တောင်းဆိုချက်ဟူ၍တခုမျှမပါချေ။ ထိုတောင်းဆိုချက်များတွင် တိုင်းရင်းသားဓနရှင်များအကျိုးအတွက်သာ လုံးလုံးဖြစ်သော ငွေတကျပ်ကို တသျှီလင် လေးပဲနိသာ သတ်မှတ်ပေးရန်၊ နိုင်ငံခြားအထည်အလိပ်များကို အကောက် ကောက်ရန် စသည်များဖြစ်၍ တိုင်းရင်းသားလယ်ပိုင်ရှင်ကြီးများအတွက် လယ်ခွန် ၅ဝ ရာခိုင်နှုန်းလျှော့ရန်ပါသော်လည်း၊ လယ်သမားများ အတွက် သီးစားခလယ်ကြွေးလျှော့ပေါ့ရေးတောင်းဆိုချက်ဟု၍ တခုမျှ မပါချေ။ ဒုတိယအကြိမ်အာဏာဖီဆန်ရေးတိုက်ပွဲ စတင်ရ သည်မှာလည်း ဘုရင်ခံချုပ်နှင့်ဈေးဆစ်ရာတွင် မတည့်သဖြင့်သာဖြစ်လေသည်။ တောင်းဆိုချက်များမှာ အထက်တွင်ဖော်ပြခဲ့သည့် အတိုင်း တိုင်းရင်းသားဓနရှင်လူတန်းစားအတွက် ဖြစ်သော်လည်း ထောင်ကျခံ၊ အနစ်နာခံရသူများမှာဆင်းရဲသားထုကြီး သာလျှင်ဖြစ်လေသည်။
ပထမအကြိမ်နှင့်ဒုတိယအကြိမ် အာဏာဖီဆန်ရေးလုပ်ငန်းခြားနားပုံကား ဒုတိယအကြိမ်တွင် ဂန္ဒီ၏ဝါဒသည် ဆင်းရဲသားလူထုကြီး ပထမအကြိမ်မှာကဲ့သို့ ၄င်းလက်မှ လွတ်ထွက်သွားမည်ကိုစိုးသဖြင့် အာဏာဖီဆန်ရေး စလျှင်စခြင်းပင် ဆင်းရဲသားထုကြီး၏ခြေ လှမ်းကို ချုပ်နှောင်ထားခြင်းပင်ဖြစ်လေသည်။ တရားဥပဒေကိုချိုးဖျက်ခြင်း စသည့် အစိုးရဥပဒေအာဏာကိုဖီဆန်စေသော်လည်း အခွန်မပေးရေးကို တားမြစ်သည်။ တား၍မရသည့်အခါကျမှ ပြည်လုံးကျွတ်မလုပ်စေဘဲ နေရပ်သတ်မှတ်၍လုပ်စေသည်။ လွတ်လပ်ရေးနေ့တွင် စကားမပြောကြရန်တားမြစ်သည်။
ဂန္ဒီဝါဒမှာ တိုင်းရင်းသားဓနရှင်တို့၏လက်ပါးစေ မည်မျှအထိဖြစ်လာသည်ကို အထည်စက်၊ ဂုန်နီစက်သပိတ်မှောက်များ၊ ဂျီအိုင်ပီ မီးရထား အလုပ်သမားသပိတ်များ။ ထိုအချိန်ဖြစ်ပေါ်သော်လည်း မည်သို့မျှကူညီအားပေးခြင်းမပြုခြင်းဖြင့် ချိန်ဆနိုင်လေသည်။ ဆင်းရဲသားလူထုကြီးမှာ အာဏာဖီဆန်ရေးတွင်အပြင်းအထန်အားစိုက်နေကြစဉ် ဂန္ဒီသည် တိုင်းရင်းသားဓနရှင်တို့၏အခွင့်အရေး အနည်းငယ်ရလာသည်နှင့် တပြိုင်နက် ဂန္ဒီ-အာဝင်းစာချုပ်ဖြင့် နယ်ချဲ့စနစ်နှင့်လက်ဆင့်ကမ်းစေ့စပ်ကာ အာဏာဖီဆန်ရေးလုပ်ငန်း ကိုရပ်စဲလိုက်လေသည်။ ဤသို့အားဖြင့် ဂန္ဒီဝါဒသည် အလုပ်သမား၊ လယ်သမား စသည့်ဆင်းရဲသားထုကြီး၏ ကြိုးပမ်းမှုကြီးကို သစ္စာဖောက်လိုက်လေတော့သည်။

ဂန္ဒီဝါဒ၏ နောက်ဆုံးအခြေ
၁၉၂ဝ ခုနှစ်မှာ ၁၉၃ဝ ခုနှစ်အတွင်း ဂန္ဒီဝါဒသည် တိုင်းပြည်လူထုကြီးကို နယ်ချဲ့စနစ်တိုက်ဖျက်ရေးအတွက်နှိုးဆွပေးလိုက်သည့် လက်နက်ကောင်းကြီးတခုအဖြစ်မှ တိုင်းပြည်လူထုကြီး တကယ့်လွတ်လပ်ရေးတိုက်ပွဲအတွက် ကြိုးပမ်းကြသည်ကို ချုပ်နှောင် ဟန့်တားသည့်အနှောင်အဖွဲ့အဖြစ်သို့ ပြောင်းလဲခဲ့လေသည်။ ပြည်သူ့လွတ်လပ်မှု အလုပ်သမား၊ လယ်သမားတို့၏ စီးပွားရေးတောင်းဆိုချက်များကိုအခြေခံထားသော ရွေးကောက်ပွဲကြေညာစာတမ်းအရ ကွန်ဂရက်ကြီးသည် ရွေးကောက်ပွဲတွင် ယှဉ်ပြိုင်အရွေးခံရာ၌ နယ် (၁၁) နယ်အနက် (၇)နယ်တွင် ကွန်ဂရက်က လုံးဝအနိုင်ရခဲ့လေသည်။ ယခုကဲ့သို့ အနိုင်ရထားသည့် အားဖြင့် တိုင်းပြည်လူထုကြီးမှာ လက်ရှိအုပ်ချုပ်ရေးကိုတိုက်ဖျက်ခါ အရေးတော်ပုံကြီးကိုစလိုသော်လည်း ကွန်ဂရက်တွင်ကြီးစိုးနေ သည့် ဂန္ဒီကြီးမှုးသောတိုင်းရင်းသားဓနရှင်တို့သည် ရာထူးလက်ခံကာအုပ်ချုပ်ရေးကို လုပ်ကိုင်ခဲ့ကြလေသည်။ ရာထူးလက်ခံသည့် ကိစ္စနှင့်ပတ်သက်၍ ဂန္ဒီကရေးသားသည်မှာ ရာထူးလက်ခံခြင်းမှာ သွေးထွက်သံယိုအရေးတော်ပုံကြီးကိုရှောင်လွဲရာကျရုံမက တနည်းအားဖြင့် လူထုကြီး၏အာဏာဖီဆန်ရေးလုပ်ငန်း စခြင်းလည်းဖြစ်လေသည်ဟုရေးသားခဲ့သည်။ (၁၇-၇-၃၇) ထုတ် ဂန္ဒီ၏ ဟာရီဂျန်သတင်းစာမှ။ ရာထူးလက်ခံပြီးသောအခါတွင်လည်း ဂန္ဒီ၏လူများသာကြီးစိုးနေသောကွန်ဂရက်အစိုးရများသည် အလုပ်သမား၊ လယ်သမားတို့၏သပိတ်မှောက်မှု၊ ဆူပူမှုများကို သေနတ်ဖြင့်ပစ်ခြင်း, တုတ်ဖြင့်ရိုက်ခြင်းပြုကြသည်ကို အကြမ်း မကြိုက်သောဂန္ဒီသည် ပြစ်တင်ရှူံ့ချခြင်းမပြုရုံမျှမက တိုင်းပြည်အုပ်ချုပ်မှုအတွက် အကြမ်းအနည်းဆုံးကိုသုံးဖို့လိုသည်ဟု ပင်ပြောဆိုကာ ကွန်ဂရက်အစိုးရများ၏လုပ်ငန်းကိုထောက်ခံလေသည်။ ဤတွင် ဂန္ဒီဝါဒ၏ အခြေခံတရားတခုဖြစ်သော အကြမ်းမဖက်ရေးမေတ္တာတရားသည် ရေဖြစ်သွားလေတော့သည်။

ဂန္ဒီဝါဒနှင့် ကုလားလူထုကြီးလွတ်လပ်ရေး
ကမ္ဘာစစ်ကြီးဖြစ်နေခါ ကမ္ဘာကြီးတခုလုံးလှုပ်ရှားပြောင်းလဲနေစဉ် ကုလားဆင်းရဲသားလူထုကြီးမှာ မိမိတို့လွတ်လပ်ရေးအတွက် အားပြင်နေကြစဉ်၊ ဂန္ဒီကြီးမှုးသောကွန်ဂရက်ခေါင်းဆောင်မှုသည် အသင့်ပြင်ဆင်ပြီးဖြစ်သောအရေးတော်လက်နက်သုံးကာ နယ်ချဲ့စနစ်ကို ဖြိုဖျက်ရန်မကြံရွယ်ရုံမျှမက နယ်ချဲ့စနစ်လက်အောက်ခံ ဒိုမီနီယံအခြေကိုရရန်အတွက် ဗြိတိသျှအစိုးရ ကိုယ်စားလှယ်ဖြစ်သောဘုရင်ခံချုပ်နှင့်စေ့စပ်နေ၏။ ဤသို့ စေ့စပ်နေစဉ်မှာပင် အစိုးရတို့သည် ကုလား၏အရေးတော်ပုံလုပ်ငန်း အားဖျက်ရန်အတွက် ပြည်သူ့လွတ်လပ်မှုကိုချုပ်ချယ်ခြင်၊ အလုပ်သမားလယ်သမားခေါင်းဆောင်တို့ကိုဖမ်းခြင်း စသည်ဖြင့် လုပ်နေ၏။ ကုလားဆင်းရဲသားထုကြီးက အင်နဲ့အားနှင့်ဖိခြင်းဖြင့် ၄င်းတို၏အားကိုမလွန်ဆန်နိုင်အောင်လုပ်နိုင်က ဂန္ဒီကြီးမှုးသောကွန်ဂရက်ခေါင်းဆောင်မှုသည် အာဏာဖီဆန်ရေးကို စတင်ပေလိမ့်မည်။ သို့သော် အခွင့်ရသည်နှင့်တပြိုင်နက် ဈေးဆစ်သည့်လုပ်ငန်းကိုလုပ်ခါ တတ်နိုင်လျှင် ဆင်းရဲသားထုကြီးကို သစ္စာဖောက်ဦးမည်။ ထိုအချိန်တွင် အလုပ်သမား, လယ်သမားလူတန်းစားသည် ယခုကွန်ဂရက်ခေါင်းဆောင်သောဓနရှင်လူတန်းကို ဖြုတ်ချ၍ နယ်ချဲ့စနစ်တိုက်ပွဲတွင် ဆက်လက်ခေါင်းဆောင်နိုင်ခဲ့လျှင် ကုလားများလွတ်လပ်ရေးရဖို့လမ်းရှိသည်။ သို့မဟုတ်လျှင်ကား ဂန္ဒီဝါဒ ခေါင်းဆောင်နေသမျှ ဒိုမီနီယံအခြေထက်တိုးတက်ရရှိဖို့ရန် ခဲယဉ်းလှပေသတည်း။
(ဗဟိန်း)ဒဂုန်မဂ္ဂဇင်း အမှတ် ၂၃၉ (ဇူလိုင် ၁၉၄ဝ)

(ယူတာက ဒီနေရာကပါ)https://www.facebook.com/profile.php?id=100003826236734&hc_location=timeline