အရင်းရှင်နယ်ချဲ့စနစ်ကိုလှစ်ဟပြခဲ့တဲ့ ဝတ္ထုတပုဒ် (ဆွေသက်ဇော်)

အရင်းရှင်နယ်ချဲ့စနစ်ကိုလှစ်ဟပြခဲ့တဲ့ ဝတ္ထုတပုဒ်

ဝတ္ထုတပုဒ်ဆိုပေမယ့် စာပေသမိုင်းဆရာတွေကတော့ "ဝတ္ထုမဟုတ်သောဝတ္ထု" ရဲ့ နမူနာလို့ ဆိုခဲ့ကြတယ်။ မူရင်းရေးသူက ရပ်ရှား မာ့(ခ်စ်)ဝါဒီ အီလျာအာရင်ဘတ်။ အင်္ဂလိပ်လို "The Life of the Automobile" အမည်ရှိ ဝတ္ထုကို မြသန်းတင့် က "မော်တော်ကားတစ်စင်း၏ အတ္ထုပ္ပတ္တိ"လို့ ဘာသာပြန်ခဲ့တယ်။ မြန်မာစာဖတ်ပရိသတ်ကို ကမ္ဘာ့စာပေတွေနဲ့ရင်းနှီးအောင် ဘာသာပြန်လက်ရာပေါင်းများစွာ ရေးသားခဲ့တဲ့ ဆရာမြက ဒီစာအုပ်ကနေတဆင့် ကမ္ဘာ့အရင်းရှင်နယ်ချဲ့စနစ်ကိုပါ မြင်စေခဲ့တယ်။

မော်တော်ကားတစ်စင်း၏အတ္ထုပ္ပတ္တိ စာအုပ်မှာ အခန်း ၇ခန်းပါတယ်။ (၁)မော်တော်ကားတစ်စင်း မွေးဖွားခြင်း။ တန်းတူညီမျှရေး ညီနောင်ရင်း သဖွယ် ချစ်ကြည်ရေး စတဲ့ကြွေးကြော်သံတွေနဲ့စခဲ့တဲ့ ပြင်သစ်ပြည် ဘူဇွာတော်လှန်ရေးကြီးမှာပါဝင်ခဲ့တဲ့ လူငယ်တယောက်။ ဖီလစ်လေဗွန် အမည်ရတဲ့ အဲဒီလူငယ်ဟာ တော်လှန်ရေးကြီးအပြီး ငါးနှစ်အကြာမှာ ညဘက်ကောင်းကောင်း အိပ်မပျော်။ လက်ဘက်ရည်ဆိုင်ထိုင်ရင် ပါးစပ်ကို ကြယ်သီးတပ်ထားနိုင်ကာမှ တော်ရုံကျလောက်အောင် စားပွဲတိုင်းမှာ တရစ်ဝဲဝဲလုပ်နေတဲ့ သတင်းပေးတွေကြောင့် အိပ်မပျော်လေ သလား။ လူငယ်ပီပီ အချစ်ရေးကြောင့်လွမ်းဆွေးပြီး အိပ်မရဖြစ်နေသလား။ မဟုတ်ပါ။ သူ့စိတ်ကူးအိပ်မက်တွေကို အကောင်အထည်ဖော်ဖို့ လုံးပန်းရင်း အိပ်မရဖြစ်နေသူတယောက်။ သူပြောတာ နားထောင်ကြည့်ပါ။

"ဆိန်းမြစ်တဖက်ကမ်းမှာ ရေနွေးငွေ့နဲ့မောင်းတဲ့စက်ရုံကို ခင်ဗျားမြင်ဖူးတယ် မဟုတ်လား။ မှတ်ထား အဲဒီရေနွေးငွေ့စက်ဟာ နိုင်ငံရေး ကြေညာချက်တွေထက် အရေးကြီးတယ်ဗျ။ ကျွန်တော် အဲဒီလိုစက်မျိုးတခုလုပ်ဖို့ ကြိုးစားနေတာကြာပြီ။ စက်နဲ့ သူ့ဘာသာသူမောင်းသွားတဲ့ ယာဉ်ရထားတမျိုးကို စမ်းသပ်လုပ်ကြည့်မယ်လို့ ကျွန်တော်စိတ်ကူးထားတယ်။ အဲဒီစက်ရထားပေါ်မှာ လူတွေကိုတင်မယ်။ သယ်ပို့ပေးမယ်။ ဒါဟာ လူအများအတွက် တကယ့်အကျိုးဆောင်တာဗျ။ ဒါမှ ကမ္ဘာ့လူမျိုးအားလုံးကို ညီနောင်ရင်းလို တန်းတူညီမျှဖြစ်အောင်လုပ်တာဗျ"။ တော်လှန်ရေးကြီးမှာ ကိုယ်တိုင်ပါဝင်ခဲ့တဲ့လူငယ်တယောက် တော်လှန်ရေးကြီးအရေးနိမ့်သွားချိန်မှာ မော်တော်ကားတစ်စင်းကို တီထွင်နိုင်ခဲ့ရင် လူအားလုံး ညီနောင်ရင်းလိုတန်းတူညီမျှဖြစ်သွားမယ်လို့ စိတ်ကူးမျှော်မှန်းခဲ့တယ်။

ဟင်နရီဖို့(ဒ်)ဆိုတဲ့ အင်ဂျင်နီယာပေါက်စလေး တပ်ဆင်ပေးလိုက်တဲ့ မော်ဒယ်၉ဝဝ မော်တော်ကားသစ် ကျေးဇူးကြောင့် ဘာနီအွိုင်းဖီးဟာ မော်တော်ကားပြိုင်ပွဲမှာ ပထမစွဲသွားခဲ့တယ်။ သတင်းစာတွေ ဝိုင်းချီးကျူးရေးသားကြလို့ ဟင်နရီဖို့(ဒ်)တယောက် ကျော်ကြားစပြုလာတယ်။ ဒါပေမယ့် သူလိုချင်တာ ကျော်ကြားမှုမဟုတ်။ ဒေါ်လာကိုသာ မက်တယ်။ ဒီတော့ အရင်းအနှီးထုတ်ပေးမယ့် ငွေရှင်ကြေးရှင်ကြီးတွေကို ဆွယ်ပြီး မော်တော်ကားထုတ်လုပ်ရေးလုပ်ငန်း ချဲ့ထွင်နိုင်အောင် ဖို့(ဒ်) လုံးပန်းတော့တယ်။ ငွေရှင်ကြီးတွေကို ဖို့(ဒ်)ဆွယ်တရားဟောနေတာ ခဏ နားထောင်ကြည့်ရအောင်။

"ကျွန်တော်တို့ဟာ ရှေ့လာမယ့်နှစ်ပေါင်းများစွာကို မျှော်ကြည့်ရမယ်။ ကျွန်တော်တို့ဟာ ဈေးကွက်ကို အပိုင်ရထားဖို့လိုတယ်။ ဈေးကွက်ကို အပိုင်ရထားဖို့အတွက် ကျွန်တော်တို့ရဲ့ကားတွေကို အရှုံးခံရောင်းနိုင်ရင် ပိုကောင်းတယ်။ အရှုံးမခံနိုင်တောင် စရိတ်ကာမိရုံလောက်နဲ့ ရောင်းနိုင်ရင်ကောင်းတယ်။ တန်ဖိုးကြီးတဲ့ကားတွေကို ထုတ်လုပ်တာထက် တန်ဖိုးနည်းတဲ့ကားတွေကိုထုတ်လုပ်တာက ပိုပြီး ဈေးကွက် အတွက် စိတ်ချရတယ်။"

အင်ဂျင်နီယာပေါက်စလေးသာဖြစ်တဲ့ ဖို့ဒ်က အရင်းရှင်နယ်ချဲ့စနစ်ရဲ့ဝိသေသတရပ်ကို ထုတ်ဖော်ပြောသွားခဲ့ခြင်းဖြစ်တယ်။ အရင်းရှင်နယ်ချဲ့ စနစ်မှာ ကမ္ဘာ့ဈေးကွက်ကို လက်ဝါးကြီးအုပ်အရင်းရှင်ကြီးတွေကသာ မောင်ပိုင်စီးခြယ်လှယ်ကြတယ်။ ကမ္ဘာ့မော်တော်ကားဈေးကွက်ကို ဖို့ဒ်မော်တော်ကားထုတ်လုပ်ရေး အရင်းရှင်လုပ်ငန်းစုက လက်ဝါးကြီးအုပ်ခြယ်လှယ်နေတာ ဒီကနေ့အထိ။ (ဗမာပြည်က အာဏာရပုဂ္ဂိုလ်များ တောင် ဖို့ဒ်ကားစီးချင်လို့ ပြည်သူ့ဘဏ္ဍာ လက်ဖြန့်တောင်းခဲ့ကြသေးတယ် မဟုတ်လား။)

အရင်းရှင်နယ်ချဲ့သမားအလောင်းအလျာလေး ဖို့ဒ်က အလုပ်သမားတွေအပေါ် သဘောထားကိုလည်း အခုလို ဆက်ပြောလိုက်သေးတယ်။

"လူကို လူကမွေးပေးလိုက်တာ ဖြစ်တယ်။ ဒီအတိုင်းပဲ။ စက်ယန္တရားတွေကိုလည်း စက်ယန္တရားတွေက ထုတ်လုပ်ပေးလိုက်တာမျိုး ဖြစ်ရ လိမ့်မယ်။ အလုပ်သမားတော့ ရှိရမယ်။ ဒါပေမယ့် အဲဒီအလုပ်သမားကို ကျနော်တို့က အသွင်ပြောင်းပစ်ရမယ်။ သူကိုင်တွယ်မယ့် စက်ယန္တရားနဲ့ လိုက်လျောညီအောင် သူ့ကို ပုံပြောင်းပေးရမယ်။ အလုပ်လုပ်နေတုန်းမှာ တွေးတောစဉ်းစားခြင်းမပြုရအောင် သင်ကြားပေးရ မယ်။ ကျွန်တော်တို့ဟာ စိတ်ကူးယဉ်ဝတ္ထုရေးနေတာ မဟုတ်ဘူး။ ဒီလို စဉ်းစားခြင်းမပြုအောင်လုပ်နိုင်မှ အလုပ်သမားပြဿနာတွေကို ဖြေရှင်းနိုင်လိမ့်မယ်။ စိတ်ပိုင်းဆိုင်ရာအလုပ်ကို မလုပ်တဲ့လူတယောက်ဟာ စက်ယန္တရားတွေကိုထုတ်လုပ်ရာမှာ အလွန်ကျွမ်းကျင်တဲ့ မက္ကင်းနစ်တယောက်ထက် ပိုပြီးအသုံးကျတယ်"။

အရင်းရှင်နယ်ချဲ့သမားဖြစ်လာမယ့် ဖို့ဒ်ပေါက်စဟာ အလုပ်သမားတွေကို "လူသားအဖြစ်ကနေ" လျှောချပစ်ဖို့ပြောခဲ့တယ်။ ဒါ့ကြောင့် အရင်းရှင်ကုန်ထုတ်စနစ်မှာ အလုပ်သမားက "mere appendages of the machinery" စက်ယန္တရားရဲ့ ဘေးအတက်အလက်လေးမျှသာ ဖြစ်တော့တယ်လို့ မာ့(ခ်စ်) က ဝေဖန်ခဲ့ခြင်း ဖြစ်တယ်။ ဖို့ဒ်က အလုပ်သမားတွေကို အဲသလိုပြောင်းပစ်ဖို့ ငွေရှင်ကြေးရှင်ကြီးတွေကို ဆွယ်စဉ်ကတည်းက ပြောခဲ့တယ်။ လူသားဟာ ကုန်ထုတ်ကိရိယာကိုအသုံးချပြီး ကုန်ထုတ်လုပ်ခြင်းကို ပြုခဲ့တယ်။ လယ်သမားက နွားနဲ့ ထွန်တုံး ထယ်စတဲ့ ကုန်ထုတ်ကိရိယာတွေကိုအသုံးချပြီး စိုက်ပျိုးထုတ်လုပ်ခြင်းကိုပြုတယ်။ အရင်းရှင်ကုန်ထုတ်ခြင်းမှာကျ အလုပ်သမားက ကုန်ထုတ်ကိရိယာကိုအသုံးချတာ မဟုတ်တော့ပဲ ကုန်ထုတ်ကိရိယာက အလုပ်သမားကို သူ့ရဲ့အစိတ်အပိုင်းအဖြစ်ပြောင်းပစ်ကာ အသုံးချ သွားတော့တယ်။ ထွက်လာတဲ့ထုတ်ကုန်ဟာလည်း အလုပ်သမားအတွက်မဟုတ်ပဲ ကုန်ထုတ်ကိရိယာအပါအဝင် ကုန်ထုတ်အရင်းအနှီးပိုင်ထားတဲ့ အရင်းရှင်အတွက်သာ ဖြစ်တယ်။

အလုပ်သမားတွေအပေါ် အဲ့လိုသဘောထားရှိပေမယ့် "ကျွန်တော့်ကို စက်ယန္တရားကြီးတခုရှေ့မှာ တပတ်လောက်သွားထားရင် ကျွန်တော် ရူးသွားမှာပဲ။ ကျွန်တော့်ဗီဇက အလုပ်တခုကို တသမတ်တည်းလုပ်ရတာမျိုးကို ငြီးငွေ့တာကိုး။ တီထွင်ဖန်တီးတတ်တဲ့သဘော တီထွင်ဖန်တီး ချင်တဲ့ဗီဇက လူတိုင်းစိတ်ထဲမှာရှိတယ်။ သူဌေးမင်းတို့ရဲ့စိတ်ထဲမှာလည်းရှိတယ်လို့ ကျွန်တော်ယုံကြည်တယ် ခင်ဗျ။ ဒါပေမယ့် ဒီလိုပုဂ္ဂိုလ်တွေ ဟာ သိပ်တော့များများစားစား မရှိဘူး။ တကယ်တော့ ကျွန်တော်တို့ဟာ အမေရိကတိုင်းပြည်ကြီးရဲ့ ဦးနှောက်တွေ။ ဒါပေမယ့် ခု ကျွန်တော်တို့ လိုနေတာက အမေရိကရဲ့ကြွက်သားတွေ"လို့ ဖို့ဒ်ပြောလိုက်သေးတယ်။ အလုပ်သမားတွေကိုတော့ စဉ်းစားတွေးတောခြင်းမပြုတတ်အောင် စက်ယန္တရားရဲ့ ဘေးအတက်အလက်လေးအဖြစ် ပြောင်းပစ်ချင်တဲ့ ဖို့ဒ်ဟာ သူကိုယ်တိုင်အပါအဝင် လူတိုင်းမှာ တီထွင်ဖန်တီးချင်တဲ့ဗီဇ ရှိတယ် ပြောသေးတယ်။ လူတိုင်းဆိုပေမယ့် လူအဖြစ်ကလျှောချခံထားရတဲ့ အလုပ်သမားလူတန်းစားကိုတော့ ထည့်သွင်းထားပုံ မရဘူး။ သူဌေးမင်းတွေမှာရှိမယ်လို့ ဆက်ပြောထားတာကိုး။ ဖို့ဒ်တို့လူတန်းစားက ဦးနှောက်တွေလို့ဆိုထားပြီး လိုနေတာ အမေရိကရဲ့ကြွက်သားတွေ လို့ ပြောထားတယ်။ ဒါဟာ လူတန်းစားကွဲပြားတဲ့အရင်းရှင်လူ့အဖွဲ့အစည်းမှာ "ကာယလုပ်အားသက်သက်" ကိုသာလုပ်ရတဲ့ အလုပ်သမား လူတန်းစားနဲ့ "ဉာဏလုပ်အားသက်သက်" ကိုသာလုပ်တဲ့ အထက်တန်းလွှာ ပညာတတ်လူတန်းစားရယ်လို့ ကွဲပြားနေခြင်းကို ဖို့ဒ်က ထင်ဟပ်ပြောဆိုလိုက်ခြင်းပဲ။ 

လုပ်အားစွမ်းပကားကို ရောင်းကုန်တခုလို ထုတ်ရောင်းစားရတဲ့အလုပ်သမားလူတန်းစားရှိပါမှ အရင်းရှင် ကုန်ထုတ်စနစ်တည်တံ့နိုင်မှာ ဖြစ်ကြောင်းကိုလည်း ဖို့ဒ် ဝန်ခံလိုက်ရာရောက်တယ်။

(၂)ကွန်ဗေယာကြိုးကြီးများ။ ရှည်လျားလှတဲ့ အလုပ်သမားတန်းကြီး။ ဝက်အူရစ်သူက ရစ်။ ဝက်အူဖုံးကျပ်သူက ကျပ်။ နောက်တစုက ဘန်ပါကို တပ်နေ။ ဘီးခွေကို ဆေးမှုတ်သူက မှုတ်။ စက်ယန္တရားကြီးက အလျင်အမြန်ရွေ့လျားနေတယ်။ စက္ကန့်လေးဆယ်သာ အချိန်ရတယ်။ စကားပြောဖို့ အချိန်မရှိ။ မော်တော်ကားတပ်ဆင်ရေးဌာနက ပီယာစံဒင်အပါအဝင် အကျဉ်းသား ၂၅ဝဝဝ ကို ပူးတွဲချည်နှောင်ထားတဲ့ ကွန်ဗေယာခါးပတ်ကြိုးက သာမန်သံမဏိကြိုးတချောင်းပါပဲ။ ဒါပေမယ့် ဒီသံမဏိကြိုးဟာ စက်မှုသိပ္ပံရဲ့ အံ့ဖွယ်သရဲလူ့အသိဉာဏ်ရဲ့ အောင်မြင်မှု အမြတ်ငွေတွေရဲ့ရလဒ် မဟုတ်ပေလော။ အရင်းရှင်ကုန်ထုတ်စနစ်မှာ ရောင်းကုန်ထုတ်လုပ်ခြင်းကို လူတွေရဲ့လိုအပ်ချက်ကို ဖြည့်ဆည်းဖို့ အရင်းရှင်ကြီးများက စေတနာ သဒ္ဓါတရားထက်သန်စွာနဲ့ လုပ်နေခြင်းမဟုတ်။ အလုပ်သမား လူတန်းစားရဲ့ လုပ်အားစွမ်းပကား ကို ရောင်းကုန်ပစ္စည်းလို ဝယ်ယူစားသုံးပြီး "အစွန်းထွက်တန်ဖိုး" ညှစ်ထုတ်ယူဖို့ဖြစ်တယ်။

တရက်တာ အလုပ်သမားတယောက်ရဲ့ လုပ်အား စွမ်းပကားတန်ဖိုးကို (၄)နာရီလုပ်အားကြာချိန်နဲ့ ပေးဝယ်ထားတယ်ဆိုရင် တနေ့ဆယ်နာရီ ခိုင်းစေတဲ့အခါ ၁၅ဝ% နှုန်း အစွန်းထွက်တန်ဖိုး ထုတ်ယူလို့ရတယ်။ အလုပ်သမားလူတန်းစားက အသိစိတ်နှိုးကြားလာပြီး အလုပ်ချိန်လျှော့ ချရေး တိုက်ပွဲတွေဆင်နွှဲလာကြတယ်။ အဲဒီအခါ တနေ့ရှစ်နာရီကို အရင်းရှင်ဘက်က မတတ်သာတဲ့အဆုံးလိုက်လျောလိုက်ရပြီ။ မတတ်သာလို့ လိုက်လျောလိုက်ရပေမယ့် နဂိုရည်ရွယ်ချက်ဖြစ်တဲ့ အစွန်းထွက်တန်ဖိုး များနိုင်သမျှ များရေးကို ဘယ်မှာ အလျှော့ပေးချင်ပါ့ မလဲ။ တနေ့ကို ၈ နာရီပဲခိုင်းရရင် ၁ဝဝ%ပဲ အစွန်းထွက်တန်ဖိုး ထုတ်ယူလို့ရသေးတယ်။ အရင်လို ၁၅ဝ% ရအောင် အလုပ်ချိန် တိုးလို့လည်း မဖြစ်။ အဲဒီတော့ အရင်က ဆယ်နာရီအတွင်းစားသုံးတဲ့လုပ်အားစွမ်းပကားကို အခု ရှစ်နာရီနဲ့ စားသုံးနိုင်အောင် လုပ်တော့တယ်။

တနည်းဆိုရရင် အရင်က ဆယ်နာရီမှာ အလုပ်သမားတယောက်က ရောင်းကုန် အခုတရာထုတ်နိုင်ရင် အခု ရှစ်နာရီနဲ့ အခုတရာရအောင် ထုတ်ခိုင်းတယ်။ ဒီသဘောကို intensification of labor လို့ မာ့ခ်စ်က ပြောတယ်။ စာဆန်ဆန်ပြောရရင် "လုပ်အားပြင်းအားကို ဆတိုးခြင်းဆိုတာ အချိန်တခုအတွင်း လုပ်အားကိုအတိုးချစားသုံးခြင်း" ပဲ။ အလုပ်ချိန်ကတော့ ရှစ်နာရီချင်းအတူတူပဲ။ ထွက်တဲ့ထုတ်ကုန်က ဆယ်နာရီစာနဲ့ ညီမျှသွားတဲ့အတွက် အရင်းရှင်အတွက် နဂိုတနေ့အလုပ်ချိန် ဆယ်နာရီတုန်းကလိုပဲ ၁၅ဝ% သော အစွန်းထွက်တန်ဖိုးကို ရရှိစေတယ်။ အလုပ်သမားအတွက်တော့ ဆယ်နာရီကနေ ရှစ်နာရီအဖြစ် အလုပ်ချိန်လျော့ပါးသွားခြင်းဟာ အမည်ခံသာဖြစ်သွားတယ်။ ထူးပြီး သက်သာမသွားတဲ့အပြင် ဆယ်နာရီလုပ်နေရတဲ့အလုပ် ကို ရှစ်နာရီနဲ့အပြီးလုပ်လိုက်ရလို့ ပိုပြီးနွမ်းနယ်တာပဲ အဖတ်တင်တယ်။ အရင်းရှင်စနစ်ဘောင်အတွင်းထဲကနေ အလုပ်သမားအခွင့်အရေးရှုထောင့်အရ အလုပ်သမားတွေကို ကာကွယ်ပေးနိုင်မယ်ယူဆတာဟာ ဒီသဘောတွေကို နားမလည်လို့သာဖြစ်တယ်။ အခုပြောတဲ့ "intensification of labor" နည်းကို ကွန်ဗေယာခါးပတ်ကြိုးကတဆင့် အသုံးချနိုင်တယ်။ တပတ်ကို စက္ကန့် (၄ဝ)နှုန်းနဲ့လည်နေတဲ့ကြိုးကို စက္ကန့်(၃ဝ)အဖြစ် မြန်နှုန်းမြှင့်လိုက်မယ်ဆိုရင် တူညီတဲ့အလုပ်ချိန် အတွင်းမှာပဲ လုပ်အားစွမ်းပကားကို ဆပွားစားသုံးနိုင်လို့ ထုတ်ကုန်ပိုထွက်လာမယ်။ အစွန်းထွက်တန်ဖိုးပိုများလာတယ်။

"သူသည် ဝက်အူဖုံးတခုကိုယူပြီး ဝက်အူအသစ်တခုကို ကျပ်ရဦးမည်။ လက်ယာရစ်ပြီး အထက်ကိုလှန်။ နောက်တခါ ပြန်ကျပ်။ သည်လိုဖြင့် ညတိုင်း အကြိမ်ရာပေါင်းများစွာ အကြိမ်ထောင်ပေါင်းများစွာလုပ်ရသည်မှာ တနေ့လျှင် ၈နာရီလုံးလုံး သည်အလုပ်ကိုပဲ လုပ်နေရသည်။ သည်လိုနှင့် တသက်လုံးလုပ်သွားရသည်။ သူ့ဘဝတလျှောက်လုံးတွင် သူလုပ်သည့်အလုပ်သည် ထိုအလုပ်တခုတည်းသာ"။

"သူ၏ခေါင်းသည် ညာဘက်သို့စောင်းနေကျ။ သူသည် ဝဲဘက်ကို ဘယ်တော့မှ လှည့်မကြည့်။ သူသည် လူသားမဟုတ်တော့။ မော်တော်ကား၏ ဘီးတဘီးသာဖြစ်သည်။"

အီလျာအာရင်ဘတ်က ကွန်ဗေယာခါးပတ်ကြိုးများအခန်းကနေ အရင်းရှင်စနစ်ရဲ့သားကောင် အလုပ်သမားလူတန်းစားရဲ့ဘဝကို အဲ့လို ရေးဖွဲ့ပြတယ်။ မာ့ခ်စ်က အရင်းကျမ်းထဲမှာ ဒီလိုရေးခဲ့တာကို အမှတ်ရမိတယ်။

"The lifetime of an instrument of labour, therefore, is spent in the repetition of a greater or less number of similar operations. Its life may be compared with that of a human being. Every day brings a man 24 hours nearer to his grave: but how many days he has still to travel on that road, no man can tell accurately by merely looking at him." [အရင်းကျမ်း- အတွဲ-၁- စာ ၁၄၄]

ကုန်ထုတ်ကိရိယာတခုရဲ့သက်တမ်းဟာ အနည်းနဲ့အများ ဆင်တူတဲ့လုပ်ငန်းတွေမှာ ထပ်တလဲလဲလည်ပတ်သုံးစွဲခံရရင်း ကုန်ဆုံးသွားတယ်။ ကုန်ထုတ်ကိရိယာရဲ့ဘဝကို အလုပ်သမားရဲ့ဘဝနဲ့ နှိုင်းယှဉ်ကြည့်နိုင်တယ်။ တနေ့တာဟာ အလုပ်သမားကို သင်္ချိုင်းဆီ (၂၄)နာရီ ပိုနီးသွားစေတယ်။ အလုပ်သမားကို အပေါ်ယံလေးကြည့်ပြီး သင်္ချိုင်းဆီသွားရာလမ်းပေါ် ဘယ်လောက်ကြာကြာ ခရီးနှင်ရဦးမလဲဆိုတာ ဘယ်သူ အတိအကျ ပြောနိုင်မလဲတဲ့။ အလုပ်သမားဟာလည်း လုပ်ရိုးလုပ်စဉ် အလုပ်တွေကိုသာ ထပ်တလဲလဲလုပ်ရင်း သေမင်းနဲ့နီးသထက်နီးနေရတဲ့ ဘဝကို မာ့ခ်စ်က ရေးပြသွားတာပါ။ ဒီသဘောကိုပဲ ကွန်ဗေယာခါးပတ်ကြိုးနဲ့ချည်နှောင်ခံထားရတဲ့ မော်တော်ကား တပ်ဆင်ရေး အလုပ်သမားတွေဘဝကို အာရင်ဘတ်က ရေးပြသွားခြင်းဖြစ်တယ်။

မော်တော်ကားပဲထုတ်ထုတ် ဘာပဲထုတ်ထုတ် ကုန်ထုတ်လုပ်မယ်ဆိုရင်တော့ အခြေခံ(၂)ချက် လိုတယ်။ တချက်က လူ့လုပ်အားစွမ်းပကား။ နောက်တချက်က ကုန်ထုတ်အရင်းအနှီး။ ကုန်ထုတ်အရင်းအနှီးမှာ စက်ပစ္စည်းလို ကုန်ထုတ်ကိရိယာတွေပါသလို သံလို ရာဘာလို ကုန်ကြမ်းတွေလည်းပါတယ်။ ကျောက်မီးသွေးလို "အကူပစ္စည်း" တွေလည်းပါတယ်။ ဒီအခြေခံ (၂)ချက်ပြည့်ပါမှ ကုန်ထုတ်လို့ရတယ်။ 

(၂ဝ)ရာစုဆန်းကာစက ပြင်သစ်ပြည် မော်တော်ကားထုတ်လုပ်ရေးလုပ်ငန်း ရဲ့ အရင်းရှင်ကြီး မွန်စီယာစစ်ထရွန် ဆိုတာ ရှိခဲ့တယ်။

"သံက ဈေးကြီးသည် ကျောက်မီးသွေးက ဈေးကြီးသည် သုတ်ဆေးက ဈေးကြီးသည်။ ထွက်ငွေစာရင်းစာမျက်နှာတွင် သူဌေးကြီးစစ်ထရွန် စိတ်ဝင်စားသည့်နေရာတခုကို သွားတွေ့သည်။ သူသည် ဆိုခဲ့သည့်ကုန်ဈေးနှုန်းများကို လျှော့မပစ်နိုင်။ သို့ရာတွင် သူလျှော့နိုင်သည့် အရာတခုတော့ရှိသည် ယင်းမှာ အလုပ်သမားခ။ ၁၉၁၉ခုနှစ်က လွန်ခဲ့ပြီ။ အလုပ်သမားကော်မတီများကိုဖျက်သိမ်းခဲ့ပြီ။ သပိတ်များ ပြိုကွဲ သွားခဲ့ကြပြီ"

(၃)တာယာများ။ မော်တော်ကားတစီးမှာ တာယာမရှိဘဲ ဘယ်လိုပြေးနိုင်ပါ့မလဲ။ ရာဘာမရှိဘဲ တာယာကို ဘယ်လိုထုတ်နိုင်ပါ့မလဲ။ ပြင်သစ် အင်္ဂလန် ဒတ်ခ်ျ အမေရိကန်တို့မှာ မော်တော်ကားစက်ရုံကြီးတွေရှိပေမယ့် ရာဘာပင်တွေမရှိ။ ရာဘာဖြစ်ထွန်းနိုင်တဲ့ရာသီဥတုမရှိတဲ့ နိုင်ငံ တွေ။ အပွေးအခေါက် ဖြူတူတူပြာတာတာနဲ့ ဟေဗီယာအမည်ရှိ အဲဒီသစ်ပင်တွေဟာ ဘရာဇီးမှာပေါက်တယ်။ သီဟိုဠ်ကျွန်း မလေးကျွန်း ဂျာဗားကျွန်းနဲ့ အင်ဒိုချိုင်းနားကျွန်းဆွယ်တွေမှာ ဖြစ်ထွန်းတယ်။ လူဖြူတွေအတွက် အမြတ်ငွေတွေယူလာပေးတဲ့ ဟေဗီယာအပင်က လူဝါတွေအတွက် သေခြင်းကိုယူလာပေးတယ်။ အရင်းရှင်စနစ်ဟာ အမြင့်ဆုံးအဆင့် "imperialism" ရောက်သွားတဲ့အခါ ကုန်ကြမ်းရင်းမြစ် တွေကို လက်ဝါးကြီးအုပ်ထိန်းချုပ်နိုင်ဖို့ လိုအပ်လာတယ်။ ဒီလို ကုန်ကြမ်းရင်းမြစ်တွေကို သူ့ထက်ငါဦးအောင် မောင်ပိုင်စီးနိုင်ဖို့ အရင်းရှင် နယ်ချဲ့နိုင်ငံကြီးတွေ လုယက်ကြပုံကို "တာယာများ"အခန်းမှာ ရင်တနင့်နင့်နဲ့ ဖတ်ရတယ်။

လန်ဒန်က လက်ဝါး ကြီးအုပ်အရင်းရှင်ကြီးဒေးဗစ်ဟာ ပီနန်ကျွန်းပေါ်လာရောက်ပြီး ဧက ၂၅ဝဝ ကျယ်တဲ့ ရာဘာခြံကြီးတခြံစိုက်တယ်။ ကူလီပေါင်း ၁ဝဝဝရှိတယ်။ အရက်ကြိုက်တတ်တဲ့ ရာဘာခြံရှင်ကြီးဒေးဗစ်မှာ အရက်စုံစပ်နည်း စာအုပ်ထူထူကြီးတအုပ်လည်း ရှိသေးတယ်။
"သူသည် ကူလီအလုပ်သမားများကို တနေ့လျှင် ပြားလေးဆယ်ပေးသည်။ သူ့အရက်စုံ တစ်ခွက်သည် ထိုထက်များစွာ အဖိုးတန်သည်။ တပြားမှ ပိုမပေးဘူးကွ ဟု မူးမူးနှင့်အော်တတ်သေးသည်။

ဒေါ်လာတွေသီးပေးသည့်သစ်ပင်များက သူ့ကိုပူးချည်ထားသည်။ သူသည် အလုပ်သမားကောင်လေးကို ကြာပွတ်နှင့်ရိုက်ပြီး ရော်ဘာခေါက် ကိုတော့ တယုတယပွတ်သပ်တတ်သည်။ ထို့နောက် မြေတွေကို ထပ်၍ဝယ်သည်။ ကူလီအလုပ်သမားတွေ ထပ်၍ထပ်၍ငှားသည်။ သူသည် သူ့ကိုယ်သူ မှန်ထဲပြန်မကြည့်ရဲ။ ထောင်ပေါင်းများစွာသောမြေဧက၏ အရှင်သခင်သည် ရှင်လျက်နှင့် သေနေလေပြီ။ သူသည်လည်း သူ့ကူလီ အလုပ်သမားများလို ရှင်လျက်နှင့်သေနေလေပြီ။ အစေးခြစ်ထားသဖြင့် ခန်းခြောက်သွားသောသူ့အပင်များလိုပင် သူသည်လည်း သေနေပြီ။"

မာ့ခ်စ် ပြောတဲ့ alienation ကို ထင်ဟပ်လိုက်တဲ့ အာရင်ဘတ်ရဲ့အဖွဲ့အနွဲ့လို့ ယူဆမိတယ်။ alienation ဟာ ကူလီတွေမှာပဲ ဖြစ်နေတာမဟုတ် ဂုတ်သွေးစုပ်နေတဲ့ အရင်းရှင်မြေရှင်ကြီး ဒေးဗစ်လည်း alienation ဖြစ်နေတာပဲလို့ ပြောလိုက်သလို။ အရင်းဟာ self-expansion ဖြစ်တယ် ဆိုတဲ့သဘောကိုလည်း မပြောပဲ မြင်လာအောင်ရေးပြသွားခဲ့တယ်။

ရော်ဘာဈေးတွေထိုးကျသွားတော့ နေမဝင်အင်ပါယာစက်ကြီးကိုမောင်းနေရတဲ့ ချာချီ ပျားတုပ်သွားပုံကို --"ရော်ဘာကို ကယ်တင်ရလိမ့်မယ် အင်ပါယာကြီးရဲ့အင်အားဟာ ရော်ဘာပေါ်မှာ တည်နေတယ်"ဟု နန်းရင်းဝန်ချုပ်ချာချီက ဆာဂျွန်စတီဗင်ဆင်ကို ပြောသည်။

ဒီလို အစိုးရက ကြားဝင်ဆောင်ရွက်တာဟာ ပုဂ္ဂလိကကဏ္ဍမှာ အစိုးရဝင်မပါရဆိုတဲ့ လစ်ဘရယ်နဲ့ လိုက်ဆေးဖဲအယူအဆသမားတွေရဲ့မူကို ချိုးဖောက်နေတယ် မဟုတ်ပါလား။ "ဒါက ဘော်လ်ရှီဗစ်ဝါဒနဲ့ ဘာထူးသေးလဲဗျ ပုဂ္ဂလိကကုမ္ပဏီတွေရဲ့ကိစ္စမှာ အစိုးရကြားဝင်စွက်တာပေါ့ ကျွန်တော့်မူနဲ့ဆန့်ကျင်တယ်ဟု အမတ်တစ်ယောက်က ညည်းသည်။ ဂုဏ်ပြုအပ်သောအမတ်မင်းသည် သူတို့၏မူကို ထိန်းမည်လော။ ရော်ဘာခြံများကို ကယ်တင်မည်လော။ ဂုဏ်ပြုအပ်သောအမတ်မင်းသည် လူမြင်ကောင်းအောင် သက်ပြင်းချလိုက်ကာ မူအတွက် မဲပေးခြင်း မပြုတော့။"

အာရင်ဘတ်ဟာ အရင်းရှင်စနစ်ကို တနည်းမဟုတ်တနည်း ကာကွယ်ပေးတဲ့လစ်ဘရယ်တွေ လစ်ဘာတေးရီးယန်းတွေရဲ့ ကြောင်သူတော် ဆန်မှုကို မြင်လာအောင် ကြောင်သူတော်တွေလို့ မပြောပဲ အထက်ပါအတိုင်း ရေးပြသွားတယ်။ ဈေးကွက်မှာ အရင်းရှင်တွေ ထင်ရာလုပ်လို့ ရနေချိန်တော့ အစိုးရကြားဝင်ခြင်းဟာ လွတ်လပ်ခွင့်ကိုထိပါးတယ် ပြောခဲ့သူတွေ minimum state ဟစ်ကြွေးခဲ့သူတွေဟာ "အကြပ်အတည်း ကာလ" ရောက်တဲ့အခါ လူထုဘဏ္ဍာသုံးပြီး အစိုးရကိုကြားဝင်ခိုင်းတော့တာပဲ။ သူတို့ရဲ့ မူတွေဟာ အဲဒီအချိန် အငွေ့ပျံသွားရတာပဲ။ ၁၉၃ဝ ကမ္ဘာ့စီးပွားပျက်ကပ် "Great depression" ကို ကြည့်မလား | လောလောလတ်လတ် ၂ဝဝ၈ Great Recession" ကို ကြည့်မလား။ အနှီ ပုဂ္ဂိုလ်တို့ရဲ့ စီးပွားရေးလွတ်လပ်ခွင့်မူကြီးဟာ လေထဲမှာပဲ အငွေ့ပျံသွားခဲ့တာ တွေ့ရမယ်။

ရော်ဘာထွက်တဲ့ မလေးကျွန်းဆွယ်ကြီးကို ကိုလိုနီလက်အောက်ခံအဖြစ်သိမ်းပိုက်ပြီး ရာဘာတွေထုတ်ယူနေတဲ့ အင်္ဂလန်က ရော်ဘာ ဈေးကွက်ကိုထိန်းချုပ်လိုက်နိုင်တယ်။ ကမ္ဘာ့မော်တော်ကားဈေးကွက်ကို အပိုင်စီးထားတဲ့အမေရိကမှာ ရော်ဘာစိုက်ပျိုးလို့မရ။ "ထိုအပင်မျိုး သည် အီကွေတာအပူပိုင်းဇုန် အပြင်ဘက်တွင် ပေါက်နိုင်ခြင်းမရှိ။ တနည်းဆိုရလျှင် အီကွေတာ၏မြောက်ဘက်နှင့် တောင်ဘက် ဆယ်ဒီဂရီ အတွင်းမှာသာ ပေါက်နိုင်သည်" လို့ အမေရိကန်သမ္မတ မစ္စတာဟူးဗား (အက်ဘရာဟန် လင်းခဲင်)ကို ရုက္ခဗေဒပညာရှင်တွေက အစီရင် ခံကြတယ်။ 

အမေရိကန်အရင်းရှင်ကြီးတွေ အပူတပြင်းလိုချင်နေတဲ့ရော်ဘာကို ချာချီတို့အစိုးရက ဈေးကိုင်ရောင်းတယ်။ ဒီတော့ အမေရိကန် ကိုယ်တိုင် ရော်ဘာထုတ်နိုင်ဖို့ သမ္မတဟူးဗားကြိုးစားရရှာတယ်။ ရုက္ခဗေဒပါရဂူတွေ မဖြေရှင်းနိုင်တဲ့ပြဿနာကို ရေတပ်ဗိုလ်ချုပ်ကြီးတွေနဲ့ ရှင်းရတော့တယ်။

"ဤတွင် သေးငယ်သည့် အလယ်ပိုင်းအမေရိကတိုက်နိုင်ငံငယ်ကလေးများကိုသိမ်းပိုက်ရန် လိုလာခဲ့ပြီး ထိုနေရာတွင် ရော်ဘာခြံများ စိုက်ပျိုး ရန်လိုလာသည်"။ လက်ဝါးကြီးအုပ်အရင်းရှင်စနစ်ဖြစ်လာတဲ့အခါ ကုန်ကြမ်းရင်းမြစ်ကိုသိမ်းပိုက်ဖို့ နယ်ချဲ့ကျူးကျော်ရခြင်းပြုလုပ်ရပုံကို အာရင်ဘတ်က သမိုင်းအချက်အခြေခံပြီး ဝတ္ထုကနေရေးပြသွားခြင်းဖြစ်တယ်။ ရော်ဘာစိုက်လို့ဖြစ်ထွန်းတဲ့ အလယ်ပိုင်းအမေရိကတိုက် နိုင်ငံငယ်ကလေးတွေကို နယ်ချဲ့သိမ်းလိုက်ရင်တောင် ရော်ဘာထုတ်နိုင်ဖို့ ရှစ်နှစ်စောင့်ရမယ်။ အမေရိကန်အရင်းရှင်တွေက ရှစ်နှစ်မပြောနဲ့ တမိနစ်တောင်မစောင့်ချင်။ ဒါကို ဖြေရှင်းဖို့က မခက်ပါဘူး။
 

"လိုက်ဘေးရီးယားပြည် ဆိုပါတော့ သူ့ကိုငွေ ချေးလိုက်ပါ။ ထို့နောက် မြေကိုဝယ်ပါ တိုင်းပြည်ကိုဝယ်ပါ ထို့နောက် အုပ်ချုပ်ရေးစနစ်တခုကို ပို့လိုက်ပါ။ ……

ဖိလစ်ပိုင်တွင်တော့ နည်းနည်းအခက်အခဲရှိနိုင်သည်။ အထူးသဖြင့် မြေဝယ်ဖို့ကိစ္စနှင့် တရုတ်ကူလီငှားဖို့ကိစ္စတွင် အခက်တွေ့နိုင်သည်။ ထိုအရာများကို တားမြစ်ပိတ်ပင်ထားသည့်ဥပဒေတွေ ရှိနေသည်။ သည်တော့ ဘယ်လိုလုပ်မလဲ လွယ်ပါသည်။ ဥပဒေကို ဖျက်သိမ်းလိုက်ရုံ ပေါ့။ ဖိလစ်ပိုင်ပြည်ကို အမေရိကန်က လွတ်လပ်ရေးပေးမည်ဟု ကတိပေးလိုက်ရုံပေါ့"

တိုင်းပြည်ငယ်လေးတွေကို လက်ဝါးကြီးအုပ်အရင်းရှင်အဖွဲ့တွေက ငွေချေးတယ်ဆိုတာ ဘာအတွက်လဲ။ စပိန်လက်အောက်က ဖိလစ်ပိုင်ကို ကယ်တင်ရှင်ကြီးဝင်လုပ်တဲ့ အမေရိကန်ရဲ့ရည်ရွယ်ချက်က ဘာလဲ။ ဥပဒေတွေဆိုတာ အုပ်စိုးနေတဲ့လူတန်းစားအကျိုးစီးပွားကိုကာကွယ်ဖို့ ဟန့်တားနေရင် လွယ်လွယ်လေး ဖျက်ပစ်လိုက်ရုံပဲ။ ဥပဒေစိုးမိုးမှုနဲ့ လူတိုင်းအကျိုးစီးပွားကာကွယ်နိုင်မယ်ထင်နေတာ လစ်ဘရယ်ဒီမိုကရက် ဆိုသူတွေရဲ့ ထင်ယောင်မှားမှုပဲ။ ဒါတွေကို အာရင်ဘတ်က တိုက်ရိုက်မပြောပေမယ့် မြင်လာရတယ်။

အခုလောက်ဆိုရင်ကို စာအတော်ရှည်နေပြီမို့ ကျန်တဲ့အခန်းတွေကို ကောက်နှုတ်မကိုးကားတော့ပါဘူး။ ဆရာမြ ဘာသာပြန်ထားတဲ့ မော်တော်ကားတစ်စင်း၏အတ္ထုပ္ပတ္တိကိုဖတ်ကြည့်ရင် 

ကမ္ဘာ့အရင်းရှင်နယ်ချဲ့စနစ်ကို မြင်လာမယ်လို့ မျှော်လင့်ပါတယ်။ ဂလိုဘယ်လိုက်ဇေးရှင်း ဂျင်းတွေကိုလည်း ဆန်းစစ်ချေဖျက်လာနိုင်လိမ့်မယ်။ စစ်တပ်နဲ့ ရွှေဝတ်မှုံလို ပုဂ္ဂလိကအရင်းရှင်ကုမ္ပဏီတွေ ရှမ်းပြည်နယ်က မြေယာတွေ သိမ်းပြီး ရော်ဘာတွေထုတ်ယူနေတာကို အရင်းရှင်နယ်ချဲ့စီမံကိန်းရဲ့ အစိတ်အပိုင်းအဖြစ် ချိတ်ဆက်သုံးသပ်ကြည့်ဖို့ လိုမယ်ထင်ကြောင်း တင်ပြလိုက်ပါတယ်။

ဆွေသက်ဇော်

ယူတာက https://www.facebook.com/search/top/?q=the%20communist&epa=SEARCH_BOX